В Королику Волошскым ремонтуют дах церкви св. Миколая

В послідніх днях в селі Королик Волошскій на Лемковині зачали ся реставраторскы працы звязаны з ратуваньом нехоснуваной од парох декад грекокатолицкой церкви Перенесіня Мощів св. Миколая. В іх рамках вольонтеры плянуют направити дах святыні.

Як інформуют орґанізаторы, роботы мали ся зачати уж в липци/юлию 2018 р., але при нагоді першых акций під церковном повалом одрыты были гнізда мышпергачів, в результаті чого треба іх было перенести на жолтен/октобер.

Головном цілю є вымінити цілу конструкцию даху, яка не была реставрувана такой од 1947 р. Перед ІІ світовом войном святыня была одновлена в 1923 р., а пак в 1930 р. Автоматично при выміні прогнилых крокви, покрытя і ін. наново ставляны будут церковны бані, што вінчат дах.

До 4. листопада/новембра 2018 р. поставлено конструкцию, яка дозволит реставрувати першу баню – найбільшу, находячу ся над головным входом до храму.

Продолжыня зачатых прац

Реставрация даху є лем продолжыньом зачатых перед трьома роками загальных ремонтовых прац, якы мают на ціли сохранити церков і прицерковны обєкты – дзвінницю та цмонтір.

В 2015 р. выстартувал проєкт ратуваня прицерковной дзвінниці в Королику Волошскым, якій успішно завершений был посвячыньом одремонтуваного обєкту при нагоді 70. річниці переселіня бывшых жытелів села на Совітску Украіну. Дзвінницю вєдно посвятили священникы грекокатолицкій та римокатолицкій.

Надале протягом 2016 р. забезпечена была част поліхроміі храму – так, жебы в пізнійшым часі могла быти перенесена на новий тинк. Быти може, по ремонті даху, дальшым, а і посліднім етапом буде реставрация середины храму.

Мрийом Стоваришыня Королик Волошскій єст основати в одреставруваным церковным комплексі музей сакральной штукы Лемковины. Місце тото мало бы быти символом браку згоду на нищыня слідів минулого.

фот. Королик Волошскій / Facebook