В Кошыцях припомянули собі ліквідацію Ґрекокатолицькой церькви

В неділю 30-го апріля в Кошыцях одбыла ся споминова стріча при нагоді річніці траґічной дії – ліквідації Ґрекоатолицькой церькви у бывшій Чехословакії. Вєдно з Кошыцьков єпархійов єй орґанізовала Конфедерація політічных вязнів Словакії і Общество свв. Кіріла і Методія. Інформовав о тім Пресовый центер Кошыцькой єпархії.

Перед 73-ма роками, 28-го апріля 1950-го року, одбыв ся комуністічныма властями зорґанізованый такзваный Пряшівскый собор, на котрім дакілько ґрекокатолицькых священиків і лаіків выголосило зрушіня Ужгородьской унії і навернутя до Православной церькви.

Втогдышні власти схосновали резултаты того згромаджіня, дали мімо закон Ґрекокатолицьку церьков, і цілый маєток перевели до властництва Православной церькви. Нихто з ґрекокатолицькых єпіскопів не перешов на православя, была то лем мала часть священиків і віруючіх. Єпіскопи были у выконштруованых процесах одсуджены на довгорічный арешт, понад сто священиків з родинами было выселеных до чеського приграніча.

Споминова стріча залача архієрейсков літурґійов у Ґрекокатолицькім катедралнім соборі Рождества Пресвятой Богородіці в Кошыцях, котру одслужыв владыка Кіріл Василь, архієпіскоп – кошыцькый єпарха. Вєдно з ним служыло веце священиків, переважно внуци або правнуци ґенерації переслідованых священиків із 1950-го року.

Меджі віруючіма были потомкове веце як 70-ох ґрекокатолицькых священиків, котры прияли позваня на тоту стрічу.

По літурґії участны пішли на Домініканьску площу, де є на бывшій будові єпархіалного уряду од року 2000 наішталована памятна табла переслідованым священикам і лаікам Ґрекокатольцкой церькви. По пєтнім акті кладжіня вінців приговорив ся Петер Сандтнер, представитель Конфедерації політічных вязнів, і отець Михал Господарь, председа Общества свв. Кіріла і Методія.

Наслідно вєдно передали участным потомкам ґрекокатолицькых священиків памятну грамоту і автобіоґрафію владыкы Йоана Гіркы з назвов Під покровом Марії. На кінцю помолили ся панахіду за переслідованых, котру одслужыв владыка Кіріл.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА