В Коцурі одпрезентовали русиньскы книжкы. Фейса кандідує на председу Руской маткы

В неділю 27-го фебруара 2022-го року одбыло ся засіданя Містной орґанізації Руской маткы в Коцурі, в Сербії, інформовала аґентура Рутенпрес.

На засіданю обговорили ся заключіня із засіданя Світовой рады Русинів, котре одбыло ся попередній день в румуньскім Переґу Маре. Професор Михайло Фейса так само говорив о резултатах із навщівы Інштітуту русиньского языка і културы Пряшівской універзіты в Пряшові ці о рихтованю презнтацій книжкы Мала історія Русинів од Івана Попа, яка лем недавно вышла і у войводиньскій варіанті русиньского языка.

Фейса участным представив і найновішы публікації Русинів карпатьского реґіону. На порихтованій выставі было коло 70 книжок, што представлює третину із вшыткых публікацій, якы Фейса приніс із пряшівского інштітуту, і мають быти подарованы русиньскій ґімназії в Руськім Керестурі, як і одділіню русиністікы на Універзіті в Новім Саді. Суть то книжкы, котры были публікованы за остатні дві десяткы років.

На стірчі обговорило ся і то, же Містна орґанізація Руской маткы буде на выборчій громаді той орґанізації, яка одбуде ся 5-го марца того року в Руськім Керестурі, пропоновати за нового председу якраз Михайла Фейсу. Фейса бы в припаді його выбратя вычеряв на тій посаді довгорочного председу Дюра Папуґу, котрый быв даякый час і председом Світовой рады Русинів, теперь є членом рады за Сербію.

Кандідатура Фейсы ся дала очековати. З тым, же стане новым председом орґанізації, ся раховало уж на остатнім Світовім конґресі Русинів, котрый у 2021-ім році одбыв ся в польскій Криниці. Фейса втогды міг за Руску матку стати і членом Світовой рады Русинів, но їх делеґація втогды рішыли, же в раді за Сербію зістане Дюра Папуґа, покля іщі є председом домашньой орґанізації.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА