В Краснім Броді посвятили новый літурґічный простор

В неділю 30-го мая 2021-го року в Краснім Броді, коло розвалин стародавного монастырьского храму отців василіянів, проходив архієпархіалный одпуст з нагоды праздника Сошествія Святого Духа. Інформовав о тім Інформачный центер Пряшівской архієпархії.

В історічнім путницькім місці русиньскых ґрекокатоликів быв на одпусті головным служытельом пряшівскый ґрекокатолицькый архієпіскоп і метрополіта Йоан Бабяк. Вєдно з ним служыли меджілабірьскый протопресвитер Йоан Блашко, протоігумен Чіну святого Василія Великого Володимір Юрій Седлачек, як і далшы священици.

Тогорічный одпуст быв вынятковый тым, же быв повязаный із посвячіньом нового ектсерьєрового літурґічного простору.

По прівітаню метрополіты отцьом Методійом Біланчіком, ЧСВВ, слідовало посвящіня новых просторів і архієрейска літурґія. На кінцю ся владыкови подяковав протоіґумен за посвячіня і участь навысшого єрархы ґрекокатоликів на Словакії на одпусті. Владыка Йоан зясь подяковав василіянам, же выбудовали новый достойный літурґічный простор, і же ся старають о тот путницькый центер.

Наперек тому, же одпуст мусив проходити при дотриманю епідемічных наряджінь, участь на нім брало велике чісло вірників з околіці, але і з оддаленішых парохій.

Пополідне архієпіскоп навщівив у супроводі далшых священиків у Выраві отця Василя Дацея, тітуларьного архідекана.

Отець Дацей є служобно найстаршым священиком Пряшівской архієпархії. В марці святковав 65-ту річніцю рукоположіня. Служыв на парохіях у Высланці, Славківцях, Підгороді ці в Гелцманівцях. Як родак з Выравы є на пензії у містнім центрі соціалных служеб.

Фотоґрафії: Теодор Марош Кость, ЧСВВ.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА