В Кружльові припомянули собі 200-річніцю храму

Неділя 2-го октобра была в селі Кружльов, Бардейовского окресу, завершіньом святковань 200-річніці Ґрекокатолицькой цеьркви Покровы Пресвятой Богородіці. Інформацію приніс про Інформачный центер Пряшівской архієпархії Станіслав Буйда мол.

Святкованя были споєны з посвячіньом храму, котрый перешов реконштрукційов. Посвячіня выслужыв владыка Петро Руснак, апостольскый адміністратор sede vacante Пряшівской ґрекокатолицькой архієпархії, братіславскый єпарха.

Одпуст на праздник Покровы

Недільне торжество опередив богатый духовный проґрам, котрый почав уж в четверь. В неділю проходив одпуст при нагоді праздника Покровы Пресвятой Богородіці, котрому є присвяченый храм в Кружльові збудованый у 1822-ім році.

Владыку привітав староста села Йосиф Кмец, котрый быв на торжественній події участный з далшыма представителями самосправы. Участь взяв і Мілан Маєрьскый, председа Пряшівского самосправного краю.

Апостольскый адміністратор посвятив інтерьєр храму, як і новый кивот в ґреческім штілі. Пак слідовала Божеска літурґія, котру владыка одправляв вєдно із домашніма священиками, священиками з деканату і шыршой околіці.

На кінцю владыка Петро уділив оцініня людям, котры помогли ку тому, жебы храм, котрый святкує 200 років, зреконштруовав ся.

При обнові поміг і ПСК

В Кружльові перед веце як 200 роками стояла деревяна церьков, котра была присвячена святому Николайови Чудотворцьови. Стояв у ареалі днешньой фарьской загороды. По тім, што выгорів, Кружльовчане збудовали муровану церьков і присвятили єй Покровы Пресвятой Богородіці.

Храм перешов веце реконштрукціями. Послідні реконштрукції проходили в роках 2021 і 2022. Были реновованы дзвоны, робила ся ціла стріха. Прибудовала ся сакрістія, обновила ся фасада і цокель, вымальовав ся інтерьєр. Реноваційов перешли і світла в храмі, роботы проходили і в околіці церькви.

Храм Покровы Пресвятой Богородіці в Кружльові быв зреновованый вдяка фінанчній підпорі з розрахунку Пряшівского самосправного краю, котрый на то выділив понад 65 тісяч евр, як і вдяка людям, котры довєдна пожертвовали 102 тісяч евр на тот ціль.

Фото: Марош Костик.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА