Голосник

В Кыйові схвалили улицю Никыфора

В столицi Украіны одтепер єдна з улиц буде носила назву єдного з найславнівшых лемківскых артистів во світі, маляря-примітивісты Никыфора Креницкого (Епифана Дровняка), родом з Крениці на Лемковині. Рішыня в тій справі підняли кыівскы містецкы власти.

В четвер, 30. липця/юлия 2020 р., містецка рада Кыйова голосувала над перемнуваньом дакотрых улиц, пляців та скверів. Голосуваня над зміном фізийоґрафічных назв в Кыйові одбыло ся в рамках веденой украіньскыма властями декомунізацийой акциі.

Улиця Никыфора Дровняка заступит дотеперішню улицю Георгія Димитрова – діяча болгарского та медженародного комуністичного руху. Улиця находит ся в десняньскым районі міста.

Запис о народжыню Епифана Дровняка во второписі метрикальных книг. Джерело: Державный Архів в Перемышли

Треба пояснити, што названя улиці іменом Никыфора Дровняка не докінця згідне з фактоґрафійом, о кілько Рада Міста помішала мено Никыфора (взяте сой артистом як псевдо – назвиско придали му комуністичны власти) з його фактичным назвиском. Артисту радше называт ся або Никыфором Креницкым, або Епифаном Дровняком (мено і назвиско потверджене метриком крещыня). В Кыйові буде улиця Никыфора Дровняка, што значыт, же кыівскы власти попутали фікцийне імя, якє взял собі артиста (по правді хоснувал го і в версиі Нетифор) з правдивым назвиском маляря, котрый любил ся підписувати на своіх творах тіж як Матейко з Крениці.

Окрем наданя назвы улиці Никыфoра, в тот ден кыівскы власти переменували дальшых пару фізийоґрафійных назв.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі