Ліґницкій Кружок Стоваришыня Лемків был основаный як єден з першых по офіцияльным зареґіструваню орґанізациі. Одділіня в Ліґници покликано в маю 1989 р. В минулу суботу, 19. жолтня/октобра 2019 р., члены Кружка упамятнили 30. річницю діяльности.
З той нагоды зрыхтувано короткій проґрам, якій зачал ся о 17.00 год. Стріча зачала од привитаня вшыткых присутных новым ведучым Кружка, Фомом Циркотом. Попросил він выголосити реферат Луку Возняка, долголітнього члена Кружка Стоваришыня Лемків, його колишнього ведучуого і учытеля лемківского языка.
Прелеґент розповіл не лем про початкы Стоваришыня Лемків, але свою доповід зачал од повоєнных дій лемківской меншыны. Споминал на Украіньскє Соспільно-Культурне Товариство і Лемківску Секцию, котры были покликаны комуністичным апаратом. Розповідал о першых пробах орґанізуваня ся лемківской діаспоры на чужыні, котры конечно товды кінчыли ся неповоджыньом. Лемкы могли офіцийно фунцийонувати лем в рамках діянь украіньской меншыны.
В своій доповіди дуже присвятил ансамбльови Лемковина з Білянкы, котрый в тым році як раз святкує своє 50-літя. Возняк спомнул, што Лемковина, яку основал Ярослав Трохановскій, была не лем фольклорным ансамбльом, але в роках пануваня комуністичной ідеолоґіі мала ролю неформальной політичной лемківской орґанізациі. Припомнено, што діяльніст Лемковины была причынком до першых Лемківскых Ватр, котры дали змогу постепенно одраджати ся пролемківскым стремліням.
Лемкы аж в 1989 р. змогли самостійно голосити свою правду. Дальше Л. Возняк розповідал і про інчы діяня, підниманы перед основаньом СЛ. Част присвячена початкам стоваришыня была підперта його власныма одчутями і споминами. Вчас доповіди вказувано мультімедияльну презентацию з фотоґрафіями і ахрівальныма документами.
Потім медже пристуныма завязала ся дебата. Старшы члены споминали на початкы орґанізациі. Бесідувало ся і про актуальный стан Стоваришыня Лемків і цілого лемківского руху в Польщы. На запрошыня Кружка, присутный на подіі был ведучый Головного Заряду СЛ, Андрий Копча.
В звязку з річницьом одроджыня ся лемківского/русиньского руху не лем в Польщы, акцептацию выкликала думка зорґанізувати проєкцию фільму Воскресеніє народа. Кружок поінформує о даті презентациі образу в найблизшым часі.
Коментарі