В Лютині одбыв ся архієпархіалный одпуст

Як інформовав говорця Пряшівской ґрекокатолицькой архієпархії Михал Павлишіновіч, почас вікенду, в днях 20-го і 21-го авґуста 2022-го року, одбыв ся в найвекшім путницькім місці ґрекокатоликів на Словакії – в Лютині, архієпархіалный одпуст ку празднику Успенія Пресвятой Богородіці.

Богатый духовный проґрам быв про віруючіх традічно приготовленый на двох місцях – в базиліці мінор прямо в селі, як і на Маріяньскій горі над Лютинов, де перед 171 роками зъявив ся святый Николай бідній вдові Зузані Фекете.

Торжественну архієрейску літурґію в неділю дополідне на Маріяньскій горі одправляв архієпіскоп Кіріл Василь, кошыцькый єпархіалный єпіскоп, котрый і проповідав.

Вєдно з ним служыли апостольскый адміністратор Пряшівской архієпархії і братіславскый єпарха владыка Петро Руснак, емерітный пряшівскый архієпіскоп і метрополіта владыка Йоан Бабяк, і емерітный торонтьскый єпарха владыка Маріян Андрій Пацак, як і дакілько десяток священиків.

На одпусті в Лютині брав участь і премєр Словацькой републікы Едуард Геґер, веце депутатів Народной рады Словацькой републікы, председа Пряшівского самосправного краю Мілан Маєрьскый зо женов Міріам Лексманн, котра є депутатков Европского парламенту, як і далшы представителі містных самосправ з околіці.

Співом головну літурґію в неділю допроводив Хор святого Романа Сладкопівця і молодежный Хор святых Петра і Павла з Мільпоша. Богослужіня зо суботы і неділі высылали ся і в цілословацькых медіах.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА