Од нового школьского року 2020/2021 прибыли на Словакії дві школы, котры мають офіціалный статус – основна школа з навчаньом русиньского языка. Іде о Основну школу на Коменьского уліці і Основну школу на Духновічовій уліці в Меджілабірцях.
Владимір Противняк, председа Містной орґанізації Русиньской оброды на Словеньску в Меджілабірцях (МО РОС) то про аґентуру TASR означів за історічный момент. Обидві основны школы, котры в місті суть, будуть такым способом мати русиньскый язык в рамках рядного навчалного процесу як предмет.
„Дотеперь ся на містных школах русиньскый язык учів лем у формі кружку, што ся од нового школьского року прінціпіално мінить,“ повів Противняк.
Як председа МО РОС в Меджілабірцях інформовав нашу редакцію, в Основній школі на Коменьского уліці будуть мати од нового школьского року русиньскый язык першокласници і другокласници. На Основній школі на Духновічовій уліці ся затля русиньскый язык будуть учіти лем в першій класі.
Покля є школа евідована як школа з навчаньом русиньского языка, першокласници мають єдну годину предмету за тыждень. В другій класі ся дотація на предмет піднимать на дві годины тыжденно.
Подля Противняка є запроваджіня русиньского языка до рядного навчалного процесу резултатом сполочной актівности самосправы – значіть міста, котре є зряджовательом основных школ, директорів обидвох містьскых школ і МО РОС в Меджілабірцях.
Жрідло фотоґрафії: ОЗ Колысочка.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА