В Меджілабірцях одкрыли найвекшу експозіцію присвячену 1-ій світовій войні

В пятніцю 2-го юла 2021-го року одкрыли в Меджілабірцях експозіцію присвячену Першій світовій войні. Свої просторы нашла в Домі културы і з приблизно 500 артефактами є найвекшов свого тіпу на Словакії.

Як інформовала аґентура TASR, войнову історію приближує тота експозіція і посередництвом емоції.

Помогли клубы воєньской історії

„Перша світова война значно засягла місто Меджілабірці і така експозіція ту дословно браковала,“ повів про аґентуру Мартін Дробняк з Клубу воєньской історії (КВГ) Бескіды, котрый вєдно з КВГ Дукля Пряшів у великій мірі поміг ку тому, жебы выникла експозіція, і жебы были запожычены артефакты.

Як далше інформовав, панелова часть експозіції обсягує основны інформації о тім, як проходили бої в Меджілабірцях і околіці.

„Є то зроблено так, жебы навщівник здобыв основны фактоґрафічны даны о боях, но єдночасно суть вшыткы дії даны до шыршого контексту цілых історічных дій Першой світовой войны. Хотіли сьме, жебы частьов експозіції была і емоція. На каждім інформачнім панелі найдеме і спомины вояків різных шарж з обидвох воюючіх сторон,“ повів Дробняк, котрый пояснив, же так собі чоловік може сухы фактоґрафічны чісла порівняти з людьсков історійов.

За словами Дробняка велику часть експозіції творять і оріґіналны артефакты, котры зберають ентузіасты довгы рокы і мали охоту пожычіти їх.

Місто хоче притягнути турістів

Як повів про медії пріматор Владислав Вышньовскый, місто проєкт експозіції, але і обновы єдного з воєньскых цінтерів з Першой світовой войны в місті плановало вже дакілько років.

„Ниґде на Словакії не найдете таке множество цінтерів і павшых вояків як в окресі Меджілабірці,“ повів пріматор. План ся подарило за словами Вышньовского зреалізовати вдяка дотації з польско-словацькой ґрантовой схемы.

Простор про експозіцію в Домі културы є подля пріматора дочасный. Місто хоче в „короткій будучности“ приготовити проєкт на выбудованя музея. Самосправа вірить, же тота тема має в комбінації з Музейом модерного уменя Енді Варгола потенціал розвивати в реґіоні турістічный рух.

Посвятили і цінтерь

В рамках торжественной патніцьовой події одбыло ся і посвячіня зреконштруованого воєньского цінтеря а памятника з назвов Канон, котрый му домінує. Подля Вышньовского є на цінтері, котрый находить ся над Домом културы, похороненых 500 вояків різных народностей.

В меджілабірцях темі Першой світовой войны є присвячена і научна стежка, котрой частьов суть окрім далшых воєньскых цінтерів і памятник Чеськой дружіны ці верьшкок Кычера, де доднесь видіти закопы вояків.

Жрідло фотоґрафії: FB/Daniela Galandová.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА