В Меджілабірцях одсвятковали 100 років орґанізованого фотбалу

2-го юла 2022-го року на фотбаловім штадіоні в Меджілабірцях одсвятковали 100 років орґанізованого фотбалу в місті. Днешній МШК Спартак Меджілабірці зачінав як АФК Метеор Меджілабірці у 1922-ім році в ІІ. окрузі Выходословацькой жупы.

Святкованя сторічніці одкрыв пріматор міста Владислав Вышньовскый. Із своїма приговорами поступно выступили і далшы цінны гості події – депутат Народной рады Словацькой републікы Душан Ґаліс, представитель Пряшівского самосправного краю Александер Ґалайда, і віцепрезідент Словацького фотбалового союзу Ріхард Гаврілла.

Ґратуловати меджілабірському клубу пришла і леґенда чехословацького фотбалу Ладислав Петраш. Не браковав ани русиньскый карікатуріста, знамый і як фотбаловый актівіста, Федор Віцо, ці бывшый фотбаловый судій FIFA Любош Михель.

68 оціненых

Перед великым оціньованьом заслуженых грачів, тренерів і функціонарів фотбалу в Меджілабірцях участны сімболічнов минутов тиха оддали почливость і память вшыткым, котры в складных условіях зачінали фотбаловый жывот в місті під Камянов.

Так само з рук Ріхарда Гавріллы за перемогу в третій лізі старшых школярів собі оцініня перевзяли членове команды тренера Павла Лукачіка.

Пак слідовало передаваня оцінінь ґрупі 68 людей, котры актівно діяли в меджілабірьскім фотбаловім клубі, ці уж, як сьме спомянули, на позіціях грачів, тренерів або функціонарів. Меджі оціненыма быв і бывшый председа Русиньской оброды на Словеньску, довгорічный секретарь Світового конґресу Русинів Володимір Противняк. Тот є окрім іншого і шпортовый актівіста, і в роках 1991 аж 1995 быв председом клубу ТЄ Спартак Меджілабірці.

Історія лабірьского фотбалу

Офіціално быв меджілабірьскый фотбаловый клуб основаный у 1922-ім році. По выникнутю Чехословацькой републікы у 1918-ім році зачали орґанізовати ся першы фотбаловы змаганя в Меджілабірцях, піоніры містного фотбалу втогды назвали свій клуб Слован Меджілабірці.

Як орґанізованый клуб у 1922-ім році зачав своє діяня в ІІ. окрузі Выходословацькой жупы лабірьскый фотбал уж під назвов АФК Метеор Меджілабірці. В роках 1932 аж 1938 кадер команды творили головно штуденты.

В році 1941 змінила ся назва клубу на СК Русь Меджілабірці, чого ініціаторами были містны професоры.

Но в тім періоді перестав актівный фотбаловый жывот в місті. У фашістічнім Словацькім штаті пришов заказ діялности клубу, кедьже команда не хотіла змінити своя назву на ШК ГҐ Меджілабірці. ГҐ в назві мало значіти Глинкову ґарду, што была половоєньска орґанізація фашістічной Глинковой словацькой людовой партії, яка была почас войнового штату при властях.

Повойнова історія

Актівный фотбал обновив ся в Меджілабірцях аж на зачатку 1950-ых років, знова під назвов СК Русь Меджілабірці. В році 1953 змінила ся назва на ДШО Татран Меджілабірці (ДШО – Добровольна шпортова орґанізація), о штири рокы пізніше то уж была ДШО Локомотіва Меджілабірці.

В далшых періодах тенденція зміны назвы реалізовала ся подля домашньой фабрикы і фотбалісты в сезоні 1962/1963 наступли під назвов ТЄ Спартак Транспорта Меджілабірці (ТЄ – Тіловыховна єднота), од року 1966 то быв клуб ТЄ Спартак Мостарень Меджілабірці, і од 1973-го року ТЄ Спартак Вігорлат Меджілабірці.

По роках сполоченьскых змін із 1989-го року пришла в році 1997 потреба трансформації, што мало своє завершіня у створіню ШК Штарт Меджілабірці. Од сезоны 2005/2006 має клуб знова назву МШК Спартак Меджілабірці, значіть вернув ся ку назві, котру хосновав од 1960-ых років.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА