В Міджілабірцях одкрыють памятну таблу СКР

В рамках 54-го річника Фестівалу културы і шпорту в Міджілабірцях, котрый буде проходити в днях 24-го аж 26-го юна 2016-го року, одбуде ся і святочна подія одкрытя памятной таблы із нагоды 25-го юбілею од зорґанізованя 1-го Світового конґресу Русинів, котрый проходив в днях 23-го аж 24-го марца 1991-го року.

Памятну таблу фінанцовав пріматор міста Міджілабірці Владіслав Вішньовскый. Буде уміщена на Културнім домі, котрый є днесь знамый головно тым, же в нім є і Музей модерного уменя Енді Варгола. Як раз в тій будові перед 25-ма роками проходив і першый конґрес.

„На памятній табліці буде напис: В просторах того будинку в днях 23-го аж 24-го марца 1991-го р. проходив 1-ый Світовый конкґрес Русинів. Світова рада Русинів – Міджілабірці 24-го юна 2016-го р. Текст буде троязычный – по русиньскы, по словацькы і по анґліцькы. Горі буде русиньскый ерб,“ повів про нашу редакцію секретарь Світовой рады Русинів Владимір Противняк. „Участь на святочній події приобіцяв і професор Павел Роберт Маґочій, котрый быв єдным із головныx ініціаторів першого конґресу,“ продовжовав Противняк.

Святочне одкрытя памятной таблы буде проходити за участи Світовой рады Русинів дня 24-го юна о 16.00 год. коло спомянутого Културного дому.

Із історії

По довгых роках українізації, котра проходила в державах комуністічного блоку, на кінці 80-тых і зачатку 90-тых років 20-го столітя основаньом русиньскых орґанізаціях зачінав повставати русиньскых рух. Днесь тот рух звеме як третє народне возроджіня Русинів. Русиньскы орґанізації, котры в розвалинах соціалізму зачали діяти і возроджовати народ в окремых державах, скоро зрозуміли, же є потрібна співпраца і в рамках цілосвітового форума.

Поступно ся одкрывали граніці міджі окремыма державами і тым ся вытворили і новы можливости про взаємны контакты міджі Русинами. Наповніньом ідеї зробити якыйсь цілосвітовый форум Русинів наповив ся у 1991-ім році, кідь завдякы запаленым і одважным Русинам з Русиньской оброды (в тім часі існовала іщі Чехословакія і назва орґанізації была лем Русиньска оброда, аж пізніше, по выникнутю Словакії зачала ся хосновати назва Русиньска оброда на Словеньску) і представителів русиньского руху в далшых пятьох державах Европы і Северной Америкы, быв скликаный до Міджілаборець 1-шый Світовый конґрес Русинів (СКР), котрый мав про Русинів велике значіня і вырішалный вплив про їх нове возроджіня. По довгім часі неслободы ту Русины світа надвязали першы контакты. Тот першый конґрес в Міджілабірцях положыв міцьный фундамент і накреслив далше прямованя свого народностного жывота і мав великый вплив на розвиток русиньской комуніты в цілосвітовім масштабі.

Од той історічной події минуло уж 25 років. За тот період собі орґанізація СКР выбудовала свою орґанізачну штруктуру, котру днесь творять представителі Русинів Словакії, Україны, Польщі, Мадярьска, Сербії, Хорватії, Чехії, Румунії і Северной Америкы (США і Канада).

Треба высоко оцінити тых людей, котры стояли при зроді міджінародной орґанізації, а то главні Василя Турока, Павла Роберта Маґочія ці Андрія Копчу, но і іншых запаленых русиньскых функціонарів з Войводины в бывшій Югославії, зо Закарпатьской области Україны і Северной Америкы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА