В найблизшу суботу посвячыня церкви в Самбожу

В суботу, 2. червця/юнія 2018 р., о 9.00 год. пройде богослужыня і посвячыня новопобудуваного храму св. Параскєвы в Самбожу (нижньошлезскє воєвідство). Тоту невелику церков будували од трьох років потомны выгнаных в 1947 р. Лемків.

18. липця/юлия 2015 р. посвячено пляц під будову церкви. Подію очелил товдышній владыка вроцлавско-щеціньской єпархіі, Архієпископ Єремія (1943-2017). Внет парохіяне зачали будувати новий храм. Причыном стараня ся про нову святыню было тото, што дотеперішня, стара каплиця, находяча ся в понімецкій забудові, была за мала, штобы помістити вшыткых вірных. Другом головном причыном, котра довела до скорых прац, был злий технічний єй стан.

Православны вірны в більшости своіма силами і фондами довершыли будову церкви св. Параскєвы. Была она заєдно сперана добровільныма датками вірных і другыма церковныма колектами. Невелика самбірска громада то Русины і іх потомкы, котры были в 1947 р. выгнаны з Лемковины і оселены в околичных селах. Теперішнім настоятельом в Самбожу єст Лемко, о. Ігор Габура. Скорше на богослужыня доізджал інчий лемківскій священник, о. Любомир Воргач з Ліґниці. Покровительком парафіі од ериґуваня єст Св. Великомучениця Параскєва, з той причыны, што більшіст прихожан то выселенці з лемківского села Чырна, де находила ся церков як раз під такым вознесіньом.

Початкы самбірской парохіі то 1952 р., коли парох в Єленій Горі і адміністратор парохіі в Мальчыцях, о. Штефан Бігун, поінформувал митрополиту Макария, што в Самбожу і сусідніх селах є вельо Лемків, якы нашли ся гын в наслідстві акциі Вісла, котры не мают свойой церкви. 15. січня/януара 1954 р. Уряд до Справ Віроісповідань передал православным евангелицку каплицю, находячу ся в забудові палацику в Самбожу. Перша Божеска Літургія была одправлена 7. квітня/апріля 1954 р. Служыл єй о. Штефан Бігун, котрий скорше нюс душпастырску опіку на Лемковині во Фльоринці.

фот. www.cerkiew-samborz.pl