В неділю одкрыють літню школу

В неділю 5-го юна 2016 р. ся святочно одкрыє вже 7-мый річник Studium Carpato-Ruthenorum. Міджінародна літня школа русиньского языка і културы Studium Carpato-Ruthenorum 2016 офіціално одкрыє ся о 17.00 год. в пряшівскім пензіоні Átrium святочнов рецепційов з културным проґрамом, котра буде одкрыта про верейность, і в рамках котрой буде выступати Анна Сервіцька з музиков Дрібна.

Єдина у світі

Міджінародна літня школа русиньского языка і културы Studium Carpato-Ruthenorum 2016 є орґанізована Інштітутом русиньского языка і културы Пряшівской універзіты. Пряшівска універзіта в Пряшові є єдинов універзітов у Словацькій републіці, котра реалізує навчаня акредітованого бакаларьского, маґістерьского і докторьского штудійного проґраму русиньскый язык і література, ґестором котрого є Інштітут русиньского языка і културы. Вдяка його 3-тыжденному едукачному проєкту Studium Carpato-Ruthenorum – Міджінародна літня школа русиньского языка і културы Пряшівска універзіта є сучасно єдинов універзітов на світі, котра зареаґовала на інтерес o таку форму навчаня русиньского языка з боку домашніх і загранічных адептів.

Лекторы зо Словакії і заграніча

Міджінародна літня школа русиньского языка і културы Studium Carpato-Ruthenorum буде мати як все лекторів зо Словакії і зо заграніча.

Курз історії Карпатьскых Русинів будуть вести Проф. Др. Павел Роберт Маґочій, Торонтьска універзіта, Канада і Мґр. Валерій Падяк, к. н., Научный центер карпатістікы в Ужгороді, Україна.

Курз русиньского языка тот рік поведуть Асіст. проф. Др. Елена Будовская, Джорджтавньска штатна універзіта), Вошінґтон, D. С., США, ПгДр. Кветослава Копорова, ПгД., Пряшівска універзіта, Словакія, Мґр. Марек Ґай, екстерный сполупрацовник Інштітуту русиньского языка і културы Пряшівской універзіты, Словакія.

Мінікурз  русиньской етноґрафії буде проходити під веджіньом Асіст. проф. Др. Елены Будовской, і проф. ПгДр. Миколы Мушинкы, др. н., екстерного сполупрацовника Інштітуту русиньского языка і културы Пряшівской універзіты.

Події про верейность

Вже традічно почас літньой школы проходять і події, котры суть одкрыты про верейность. Окрім святочного одкрытя школы будуть і далшы три події, котры на котрых може брати участь шырока публіка.

У віторок 14-го юна 2016-го року в Словацькім народнім музею – Музею русиньской културы в Пряшові буде од 17.30 год. проходити презентація русиньской анґліцькой приповідковой книжкы Михайла Гиряка В сімдесятій семій країні. О книжці ся веце можете дізнати в нашій статі за мотузком.

23-го юна можете іти на Літературный вечур під назвов Смутный клавн, віршы і ґітары, або русиньска поезія дакус іншак, котрый зачінать о 19.00 год. на Великій сцені Театру Александра Духновіча в Пряшові. В проґрамі зазвучать віршы русиньскых авторів Штефана Сухого, Юрка Харитуна, Валерія Купкы, Владіслава Сивого, Кветы Мороховічовой-Цвик і Даніелы Капральовой. О музику і спів ся постарать Владіслав Сивый і Томаш Сивый. Декламовати будуть акторы Театру Александра Духновіча в Пряшові Іґор Латта, Людмила Козменкова, Зузана Ковалчікова, Ладіслав Ладомиряк. Сценарь і режію приготовила Яна Трущіньска-Сива.

Про верейность буде одкрыте о святочне передаваня цертіфікатів о абсолованю літньой школы повязане із офіціалным закінчіньом школы. Тото одбуде ся о день пізніше, 24-го юна, в пензіоні Átrium од 18.00 год. І на тот вечур є приготовленый і културный проґрам.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА