В Новім Саді бісідовали о проблемах фінанцованя русиньского театру

Як інформує Рутенпрес, 21-го октобра 2021-го року в Новім Саді, на Секретаріаті про културу, публічне інформованя і односины з реліґійныма комунітами Автономной области Войводина, проходила робоча стріча з ініціатівы Націоналного совіту Русинів.

На стрічі были участны секретарь про културу Автономной области Драґана Мілошевіч, председа Націоналного совіту Русинів Борислав Сакач, як і директор Русиньского народного театру „Петро Ризнич Дядя“ Славко Орос.

Націоналный совіт інціовав стрічу з причіны тяжкых условій, в котрых ся русиньскый театер находить вже довшый час. Участны обговорили ключовы темы, котры треба порішыти, жебы досягнути тырвале рішіня про оптімалне фунґованя той театралной інштітуції Русинів у Сербії. В першім шорі то є вопрос фінанцованя і зряджователя театру.

Драґана Мілошевіч приобіцяла, же пробадать пропонованы русиньсков делеґаційов рішіня. За їй словами бы меншыновы театры могли быти дефінованы за моделом заводів про културу і прямє фінанцованя бы ся могло вытворити про вшыткых пять такых меншыновых театрів, котры у Войводині діють з тым, же каждый театер бы дістав річный бюджет 3 міліоны дінарів (понад 25 тісяч евр).

Окрім того обоговорила ся і справа будованя окремого театралного обєкту в Новім Саді, котрый бы служыв народностным меншынам Автономной области Войводина, і якый бы мав технічне і адміністратівне забезпечіня, котре театер выжадує.

Жрідло фотоґрафії: Рутенпрес.