В Новым Санчы дві конфесиі в єдній церкви

В послідню неділю, 23. квітня/апріля, в скансені в Новым Санчы, де находит ся забыткова церков св. Димитрия зо села Чорне, православний парох з Крениці – о. Петро Пупчык, правил першу вечырню – інформує сайт Польской Автокефальной Православной Церкви (www.orthodox.pl).

Православны богослужыня в Новым Санчы од той поры мают быти правлены реґулярно в рамках покликаного православным владыком перемышльско-ґорлицкым Паісийом душпастырского пункту. О найблизшых богослужынях буде інформувала православна парохія св. Владиміра Великого з Крениці, м.ін. на своім фейсбуковым фанпейджы.

Іщы перше своі богослужыня в храмі св. Димитрия зо села Чорне зачала правити грекокатолицка Церков. В Новым Санчы од 1983 р. істніє парохія свв. Владиміра і Ольгы. Душпастырску послугу для грекокатоликів в тым храмі несе парох церкви свв. Апостола Петра і Павла з Крениці – о. Йоан Піпка.

Можніст хоснуваня церкви св. Димитрия в Новым Санчы довєдна через дві конфесиі выникат з того, же храм є власністю Округового Музею в Новым Санчы. В 1993 р. зруйнувану церков з неістніючого лемківского села Чорне музейникы рішыли перенести до Нового Санча, цілю єй ратуваня. До 2001 р. храм был розобраний і тримано го в музейных маґазинах, аж пізнійше наново поставлено го на териториі сандецкого музею. Бывша грекокатолицка церков з Чорного є датувана на 1783 р. В 20. роках ХХ ст., коли селяне довершыли конверсиі на православя, стара грекокатолицка церков перестала быти хоснувана. Такій стан утримувал ся не лем до 1947 р., коли русиньскы родины, якы не пішли добровільно на Радяньску Украіну, были насильно выгнаны на західні землі Польщы, але досправы церков была нехоснувана аж до 1993 р.

По 1928 р., коли Лемкы з Чорного стали ся вірныма православной Церкви, поблизко грекокатолицкой святыні побудувано нову, православну, яка своім видом неґрамотні навязувала до той старой з ХVIII ст., головно вежом. Православна церков (на першым пляні на знимці горі) стояла до осени 1968 р./яри 1969 р. Архівальна знимка горі зроблена была в квітни/апрілю 1968 р.; автор Генрик Ольшаньскій.

Про історию та архітектуру церкви слухайте в архівальным одтинку проґраму «Реґістер Забытків», котрий найдете в нашых подкастах (безпосередній мотузок до того проґраму найдете гев).

Долов поміщаме знимкы авторства Миколая Ґрича, представляючы недільну вечырню.