В Одреховій перебывала консерваторска комісия

Од деякого часу думаючы про Одрехову і тамтышню грекокатолицку церков, одраз іде на мысель проєкт, якому мено «Таємниці Одреховы». То вартістна ініциятiва, яка має за основну ціль ратувати забыткы одрехівской церкви. Тота же ініциятива кінцьом 2016 рока была нагороджена в Конкурсі Ґенерального Консерватора Забытків на найліпший едукацийний проєкт о дідицтві.

Дальшыма етапами проєкту была медже інчыма візитация консерваторской комісиі, котра проходила тыжден тому, 14. лютого/фебруара т.р., в Одреховій. Єй задачом было вписаня до реґістру забытків бічного олтаря та процесийного креста, котры то были найдены на поді церкви, як раз при проєкті «Таємниці Одреховы». Одрехову одвиділ Воєвідскій Уряд Охороны Забытків в Перемышли – делеґатура з Коросна. Як заявляют ведучы проєкту, оне вписаня предметів до реґістру є завершыньом іх діянь, но попри тым і дозволит зачати дальшы консерваторскы роботы, так на бічным олтари, як і кресті.

Дотеперішні консерваторскы досліджыня дозваляют высунути припущыня, же крест і бічний олтар (менуваний як «зелений») праводоподібно походят іщы з попередньой деревяной церкви. Сам олтар был двократно реставруваний. Під зеленом поліхромійом находит ся вчаснійша блакітна, а дальше під ньом остаткы розпису з ІІ половины ХVIIІ ст. По інвентаризациі вказало ся, же в давній церкви мусіли ся находити два такы самы олтарі. В Єпархіяльным Музею в Перемышли переховувана є ікона авторства Юлияна Панкєвича, представляюча св. Миколая, котра своім выглядом впасовує ся в раму олтаря. Ікона была написана в ХІХ ст. на замовліня товдышнього пароха Одреховы – о. Антония Лавровского, і  заступила старшу ориґінальну, котра здобила єден з реченых олтарів.

Цілю проєкту «Таємниці Одреховы» є оновліня і консервация того, што лишыло ся по выселінях в бывшій грекокатолицкій церкви Св. Йоана Крестителя в Одреховій, котра тепер служыт як римокатолицкій костел. Днешня римокатилицка парохія, де служыт о. Мариян Бондаль, каждий рік веде інвестициі, односячы ся до консервациі і охороны забытків, якы складают ся на маєток храму. До той поры всякы фізично-хімічны ай історичны досліджыня, проведены в рамках стипендиі Міністерства Культуры і Народового Дідицтва, дозволили оцінити приблизны рокы іх повстаня, як тіж пошырити знаня на іх тему і, обще, тему одрехівской церкви.

Тоты і більше фотоґрафій найдете на Фейсбуковым сайті проєкту.