В окресі Снина наштартовав ПСК вызначны проєкты

Председа Пряшівского самосправного краю (ПСК) Мілан Маєрьскый абсословав далшу робочу навщіву, тот раз в окресі Снина. Як інформовала Леа Леготьска із Одділіня комунікації ПСК, із соціо-економічныма партнерами діскутовав жупан в понедільок 27-го мая 2024-го року о зреалізованых інвестіціах на теріторії, і о потенціалі.

Пряшівска жупа до того реґіону інвестує не малы фінанції, жебы забезпечіти про 24 сел воду і про 28 сел окресу каналізацію. Окрім того будує ся 74-кілометрова біціґльова траса Poloniny trail, котра має ожывити турістічный рух і буде мати капчаня з Польщов і Українов.

Приготовлены проєкты за десяткы міліонів

ПСК проінвестоав при цілковых приправах і проєктовых роботах на забезпечіня воды і каналізації в окресі Снина дотеперь єден міліон евр. З роботами в штирьох русиньскых долинах – Пчолине і околіця, Убляньска долина, Влычска долина і Збойска долина, хоче продовжовати і в далшім періоді.

Планованы суть і далшы проєкты, котры мають зліпшыти жывот в реґіоні. В рамках інтеґрованой теріторіалной стратеґії має край приготовленых 22 проєктів за цілкову суму 23 міліонів евр.

„По зрахованю передсхваленых проєктовых замірів Радов партнерства належыть Сниньскый окрес меджі окресы з найвекшов алокаційов по перерахованю на жытеля,“ повів председа ПСК Мілан Маєрьскый.

Інвестіції до драг в русиньскім реґіоні

Пряшівска жупа од 2018-го року проінвестовала в окресі вже 16,7 міліона евр до інфраштруктуры драг, оправило ся 41,4 км драг і 13 мостів. Тот рік хоче край докінчіти модернізацію драгы II/558 в окресі Снина, але і модернізацію драгы  II/567 Пчолине – Снина, як і реконштрукцію моста через потік Удава перед селом Гостовіці довєдна за 1,2 міліона евр.

Далшых десять міліонів евр планує інвестовати край в найблизшім періоді до реконштруцкії частей драг Гостовіці – Пчолине і Стащін – Влыч ІІІ. етапа, оправы веце опорных мурів і коло штирьох мостів у окресі Снина.

Навщівили і Колоніцьке сідло

На зліпшіня служеб у своїх соціалных заряджінях дав ПСК 671 тісяч евр, до модернізації школ 677 тісяч евр, в рамках дотачных схем ту підпорив проєкты за 1,06 міліона евр.

Председа ПСК Мілан Маєрьскый навщівив почас свойой робочой навщівы і Астрономічну обсерваторію на Колоніцькім сідлі.