В Осаднім припомянули собі 100 років од кінця войны

11-го новембра 1918-го року точно о 11-ій годині і 11-ій минуті закінчіла ся Перша світова война. 100 років од кінця Великой войны, як ся звыкне называти, припомянули собі і в селі Осадне.

В кріпті вояків із Першой світовой войны, котра находить ся під містнов православнов церьквов, зышло ся в неділю 11-го новембра 2018-го року дакілько віруючіх із Осадного, но і Меджілаборець, Свідника ці Пряшова, жебы помолити ся за вшыткы жертвы той войны. Панахіда, котру служыв осадняньскый православный парох Петро Сорока, зачала на минуту точно од підписаня договору о закінчіню войны. Інформовав о тім сайт krypta.sk.

Домів ся вже не вернули

Сорока ся участным приговорив у проповіді.

„Вояци, на котрых кости смотриме, вмерли в околіці Осадного на про них чуджій теріторії. Векшына з них были молоды люди, котры мали жывот перед собов і як мі раз повіли російскы навщівници при погляді на тоты кости ‚Смотьте, ту нашы вымерты села‘. Они може ани не знали прошто і за кого воюють, но домів ся вже ниґда не вернули,“ повів в проповіді містных духовный.

Зато є за словами Петра Сорокы потрібне не забывати на тоты світовы траґедії і молити ся, жебы до того вже ниґда веце не дішло.

„Бо так, як была Друга світова война траґічніша як тота перша, не дай Боже, припадна далша война буде траґічніша як попередня,“ одзвучало в проповіді почас панахіды, яка была одслужена в кріпті.

Северовыход Словакії в тяжкых боях

Як раз теріторія днешньой северовыходной Словакії была постигнута найтяжшыма боями почас Першой світовой войны. На тій теріторії є і найвеце воєньскых цінтерів із той епохы.

Унікатным цінтерьом є кріпта під православнов церьквов в Осаднім, де є в єднім гробі похороненых 1025 вояків. Далшых 1400 лежыть в двох шахтах на містнім цінтерю. Похоронены вояци вмерли в роках 1914 і 1915, кедь в навколишніх лісах проходили тяжкы бої. Втогды были вояци похоронены прямо в лісах або в селах на цінтерях.

В роках 1933 аж 1934 были кости вояків перенесены до новозбудованой церькви в Осаднім. Їй будованя втогдышні уряды позволили з тым, же буде служыти як памятник російскых вояків. Кідьже ся ту вшыткы ексгумованы кости не вмістили, решта была похоронена в шахтах на міснтім цінтерю.

Кріпта была зреконштруована в році 2005 і днесь є єдным із інтересных турістічных пунктів в тій области. Памятник над шахтами на містнім цінтерю выбудовали в році 2012.

Жрідло фотоґрафії: krypta.sk.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА