В Підгороді хотять зробити комунітну муштарню

Схосновати овоцину із стромів в сельскім овоцинарьскім саді в русиньскім селі Підгородь Собранецького окресу хотять добровольници з містного обчаньского здружіня і в комунітній добровольній муштарні.

Тота має выникнути в сутерені Културного дому. Як аґентуру TASR інформовав Матєй Муха, цільом той актівности є быти посередником про домашніх жытелів при вказаню „скрытого потенціалу овоцины“ і створити в реґіоні традіцію муштованя.

„Ґаздівску муштарню в селі Підгородь не будеме хосновати самы, в першім шорі буде простором про выробу овоцных щав про вшыткых заінтересованых за добровольный фінанчный дар. Мы радо муштованя вкажеме, научіме заінтересованых робити з хоснованыма механізмами,“ повів Муха з тым, же першов великов зорґанізованов подійов у муштарні буде сполочне муштованя в осени, почас публічного самозбераня овоцины в містнім овоцнім саді.

Містне обчаньске здружіня о овоцны стромы, з котрыма в минулости ґаздовало підгородьске польногосподарьске дружство, старать ся од зачатку 2020-го року. За два рокы в сельскім саді одпрацовало 40 добровольників довєдна 900 годин.

„І вдяка фіначній підпорі різных фундацій зревіталізовали 1,5 гектара садів і сприступнили 90 старых стромів, котры по роках знова родили, высадили 20 новых стромів інтересных одрод,“ пояснив про аґентуру шеф добровольників Юрай Сеніч. За його словами ідейов проєкту, котрый має назву Сады Вігорлату, є дати домашнім і гостям нагоду на актівно пережытый вольный час і творіня сполочных цінностей.

Часть овоцины зо садів роздавають школам і домам соціалных служеб в околіці, з решты вырабляють мушт, котрый давають дарцям як нагороду за фінанчны дары. Окрім бріґад орґанізують про людей курзы з тематіков култівації і старостливости о овоцны стромы.

„Тішу ся, же молоды в селі мають намагу обновити бывшый потенціал продукції овоцины. Тоты актівности, окрім укріпліня домашніх односин, до нас тігають новых навщівників і розшырюють знаня о нашім реґіоні,“ сконштатовав староста села Підгородь Антон Грицько.

Жрідло фотоґрафії: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА