В Полонинах інвестують до ціклістічной інфраштруктуры. Робити ся буде і на україньскім боці

В Полонинах прибудуть інтеліґентны ціклопритулкы, оддыховы зоны ці ціклотрасы. В рамках проєкту з Українов ся проінвестує понад міліон евр, з цільом підпорити черезгранічну співпрацу при будованю двох ціклоокругів.

Як інформовала в пятніцю 4-го юна 2021-го року Леа Геілова з Одділіня комунікації і пропаґації Пряшівского самосправного краю (ПСК), председа краю Мілан Маєрьскый підписав ґрантовый контракт ку проєкту під назвов Зліпшіня доступности і мобіліты в рамках SK-UA черезгранічного реґіону.

Цільом проєкту, котрый є называный і Карпатьска мобіліта, є підпорити черезгранічну співпрацу при будованю двох ціклоокругів – на словацькім боці є то Полонины трейл, на українськім Ужаньскый трейл.

Ціклопритулкы в Стащіні і Улічі

„В рамках розрахунку, котрый перевышує єден міліон евр, ся змодернізує понад шість кілометрів ціклотрас і выбудують ся елементы ціклоінфраштруктуры. Піде наприклад о інтеліґентны ціклопритулкы в селах Уліч і Стащін, але і оддыховы зоны в Улічі. Тішыть ня, же поступныма кроками ся ближыме ку зреалніню пропонованой ціклотурістічной трасы Полонины трейл, котра має служыти про домашніх, але і турістів,“ повів председа ПСК Мілан Маєрьскый.

На україньскім боці граніці піде головно о вычіщіня ціклістічных трас, значіня ціклотрас, будованя парковиск про біціґлі, іншталацію інформачных кіосків і маповых схем на ціклістічных трасах ужаньской біціґльовой стежкы.

Перепоїня на гранічный переход

Проєктове конзорціюм, на чолі котрого є ПСК, творить і далшых пять партнерів. На Словацькім боці суть то села Уліч і Стащін, як і Лісосельскогосподарьскый маєток Уліч. На україньскім боці то самосправа Великый Березный і Меджіреґіоналный центер загранічной співпраці з Перечина.

Мілан Маєрьскый інформовав, же Пряшівскый самосправный край окрім коордінації цілого проєкту зробить і технічну штудію перепоїня полониньской ціклостежкы на актуалный гранічный переход Убля – Малый Березный, і то докінця з алтернатівов потенціалного будучого переходу Уліч – Забрідь.

Проєкт Карпатьска мобіліта быв схваленый в рамках проґраму черезгранічной співпраці ENI HUSKROUA іщі в новембрі минулого року, його імплементація зачала теперь в юні. Візійов проєкту є зліпшыти біціґльовы обставины модернізаційов односной інфраштруктуры поздовж полониньскых і ужаньскых трас.

Жрідло фотоґрафії: Manfred Antranias Zimmer/Pixabay.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА