Голосник

В Полонинах має выникнути резервація Великый Буковець

На теріторії Народного парку Полонины бы мала выникнути природна резервація Великый Буковаць. Пропозіцію приготовлює Державна охорона природы Словацькой републікы (ДОП СР). Про аґентуру TASR то повіла директорка секції охороны природы і країны ДОП СР Марта Мутнянова.

Выголошіньом резервації ся має подля Мутняновой забезпечіти охорона локаліты Світовой дідовизны UNESCO Стары буковы лісы і буковы пралісы Карпат, і іншых реґіонів Европы, конкретно часть Стужіця – Буківскы верьхы. Великый Буковець має быти на теріторії з выміров 973,97 гектарів.

Мутнянова інформовала, же теріторія бы мала быти розділена на зону А, де є пропонованый пятый ступень охороны, і зону Б, де бы мав быти четвертый ступень. На вымедженім охраннім поясі бы мав платити третій ступень охороны.

Іщі ся не знає коли

Пропонована природна резервація надвязує на вже існуючі природны резервації Бурсучіны і Бурсуків верьх, і народны природны резервації Стужіця і Яряба скала.

„Сотворить ся так компактна корінна зона компоненту Світовой дідовизны UNESCO, в котрій буде забезпеченый беззасяговый режім так, як то выжадують условії зараджіня теріторії меджінародного значіня,“ повіла про аґентуру Мутнянова.

По проїднаню заміру выголосить природну резервацію влада Словацькой републікы. „Точный термін выголошіня ся того часу не дасть становити,“ закінчіла директорка.

Жрідло фотоґрафії: www.severovychod.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі