На Проґрам старостливости о ліс, котрый про лісну теріторію Старина в Полонинах, окрес Снина, на рокы 2020 аж 2029 схвалив кінцьом року Окресный уряд в Пряшові, напало Лісоохранарьске здружіня VLK.
Інформовала о тім пресаґентура TASR. Лісосельскогосподарьскый маєток Уліч твердить, же кедь ся не буде здобывати дерево, огрожены суть і робота а мзды.
Лісоохранарьске здружіня ся одликало односно рішіня Окресного уряду Пряшові з тым, же проґрам за поглядом охранарів не бере до увагы дакотры параметры, наприклад енвіроменталну оцінку EIA, котров ся оцінюють впливы на жывотне оточіня.
Підпора проґраму од урбаріатів і старостів
Лісосельскогосподарьскый маєток Уліч твердить штось інше. Проґрам господаріня за поглядом державного поднику бере до увагы вшыткы аспекты господаріня на теріторії, котра є хранена. В припаді, же бы ся переоцінило рішіня Окресного уряду, подник ся боїть о будучность реґіону.
Під одкрыте писмо, котре в повязаню з цілым припадом державный подник адресовав трьом міністрам, підписали ся і представителі урбаріатів, котры діють на тій теріторії, а так само і старостове сел Улічской долины.
„Тота лісна теріторія представлює коло 50 процент компетенчной парцелы Лісосельскогосподарьского маєтку Уліч, і шторік на нім має здобыти ся 35 тісяч метрів кубічных деревляной матерії, што є коло 50 процент дерева з цілкового здобываня поднику,“ пише ся в одкрытім писмі, котре было адресоване міністрам земледільства, жывотного оточіня, і роботы, соціалных справ і родины.
Писмо вказує на факт, же „покля ся не буде реалізовати здобываня дерева, не будуть заробіткы, а не буде ани на мзды.“
Як далше інформує ся в писмі, в припаді, же ся не буде тото природі близке господаріня включно здобываня дерева реалізоватл, на то, жебы подник зістав у зыску, буде мусити пропустити з роботы 90 робітників і закінчіти робочо-юрідічны односины з далшыма 40-ма людми, котры роблять на жывность. Улічску долину притім означують як долину голоду.
Перінай: Маме строгішы правила як дефінує закон
Подля директора державного поднику Марія Періная предметный проґрам старостливости о ліс при авізованім природі близкім господаріня рядить ся „омного строгішыма наряджінями, як їх дефінує закон і припис о Храненій теріторії птахів Буківскы верьхы“, котры мають окрім іншого забезпечіти утриманя, респектівно зліпшыти стан біотопів і видів европского значіня.
Єднако є за словами директора тот проґрам в згоді з Проґрамом старостливости о Народный парк Полонины.
І кедь одкликаня здружіня VLK не має на рішіня Окресного уряду в Пряшові ефект одкладу платности, державный подник ся до здобываня дерева на теріторії Старина затля не пущать. „Рішіня є выконательне, но іде на розпор на міністерство. Не знам преюдіковати, як міністерство вырішыть,“ повів про аґентуру Перінай. Не хоче рісковати, же кебы зо здобываньом зачали, а міністерство бы переоцінило проґрам, могло бы то запричінити маєткову шкоду.
Боять ся о роботу
Темов занимать ся і денник Korzár. Редакторка денника Яна Отріова маповала 12-го януара 2021-го року сітуацію в реґіоні. В тот день робітници Лісосельскогосподарьского маєтку Уліч, членове урбаріатів і люди, котры роблять на жывность пришли вказати свою неволю з діяньом охранарів прямо перед подник в селі Уліч.
„Бою ся, же прийду о роботу. Є ту много жывностників, котры бы зістали без роботы. Потребують жывити родины, мають пожычкы,“ высловив за вшыткых обаву Ян Петік із Новоселиці.
Жрідло фотоґрафії: www.lpmulic.sk
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі