В Попраді проходить літня школа про дітей із Войводины

Як інформовала аґентура Рутенпрес, од понеділька 17-го юлія до неділі 23-го юлія 2017-го року в Попраді на Словакії проходить Літня школа русиньского языка, на котрій бере участь 30 русиньскых школярів зо сербской Войводины. Є то вже тертій річник літньой школы.

На школі беруть участь школярі основых школ, головно зо шестой і семой клас, на котрых є навчалный язык русиньскый або ся учіть русиньскый язык як волительный предмет. Суть то школярі, котры досягли в рамках школьского року добры резултаты в учіню і змаганю. Того року має своїх школярів на літній школі Руськый Керестур, Коцур, Дюрдьов, Вербас, Кула, Новый Сад, Суботніця, Новый Орахів, Шид, Беркас і Бікіч.

На літній школі мають участны лекції із русиньского языка, історії, ґеоґрафії, реліґії і музичной выховы. Окрім того занимають ся шпортовыма актівностями, але і інформатіков, на котрій ся діти учать наприклад як наіншталовати русиньску клавіатуру на компютерах. Коло того про них были приготовлены і навщівы околіці – Старой Любовні ці Штырбского плеса.

Жрідло фотоґрафії: Рутенпрес

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА