В Пряшові одбуде ся 8-ый річник русиньской літньой школы

4-го юнія 2017-го року зачне ся вже 8-ый річник Studium Carpato-Ruthenorum – Міджінародной літньой школы русиньского языка і културы, котра є орґанізована Інштітутом русиньского языка і културы Пряшівской універзіты в Пряшові. Літня школа зачне пєтным актом коло Памятника Александра Духновіча в Пряшові і пак буде святочне одкрытя проходити в пензіоні Átrium.

За попередніх сім річників літню школу абсолвовало 150 штудентів, котры были зо Словакії, Споєных штатів Америкы, Україны, Канады, Польщі, а і далшых держав світа як Булґарія, Сербія, Арґентіна. На тогорічне Studium Carpato-Ruthenorum 2017 є приголошеных 18 штудентів. Окрім домашніх штудентів зо Словакії буде мати літня школа тот рік участників і з Україны, Споєных штатів Америкы, Канады, Чехії і Італії. Минулый рік мала школа 24 штудентів, із котрых 17 было загранічных.

Studium Carpato-Ruthenorum 2017

Міджінародна літня школа русиньского языка і културы Studium Carpato-Ruthenorum є орґанізована шторік русиньскым інштітутом в Пряшові. Вдяка тому тротыжденному едукачному проєкту, в рамках котрого штуденты діставають лекції із языка, історії і етноґрафії, Пряшівска універзіта є єдинов універзітов на світі, котра зареаґовала на інтерес o таку форму навчаня русиньского языка і културы з боку домашніх і загранічных адептів.

На тогорічній літній школі лекції будуть передавати так як все з трьох предметів і курзы будуть ведены по русиньскы і по анґліцькы. Курз історії карпатьскых Русинів по русиньскы буде передавати Мґр. Валерій Падяк к. н. з Інштітуту русиньского языка і културы Пряшівской універзіты в Пряшові, анґліцькый курз буде вести Проф. Др. Павел Роберт Маґочій із Торонтьской універзіты в Канаді.

Курз русиньского языка має на старости по анґліцькы Асіст. Проф. Др. Елена Будовская із Джодржтавньской універзіты у Вашінґтоні вєдно із Мґр. Мареком Ґайом, екстерным робітником русиньского інштітуту. Русиньскый язык по русиньскы будуть передавати ПгДр. Кветослава Копорова, ПгД. і Мґр. Зденка Цітрякова, обидві із русиньского інштітуту.

Ани тот рік не буде браковати мінікурз русиньской етноґрафії. Тот буде під веджіньом Проф. Патріції Крафчік в анґліцькім языку, русиньскый курз буде вести Елена Будовская.

Богатый проґрам

Штудентів і тот рік окрім лекцій з історії, языка і етноґрафії чекать і богатый супроводный проґрам. В рамках нього є навщіва Театру Александра Духновіча, единого на світі професіоналного театру, котрый грає по русиньскы. Участници собі будуть годны посмотрити пєсу Козьмы Пруткова під назвов Фантазія. На проґрамі є і бісіда з Павлом Робертом Маґочійом о його книжці Хырбетом ку горам: Історія Карпатьской Руси і карпатьскых Русинів (Chrbtom k horám: História Karpatskej Rusi a Karpatských Rusínov), котра лем ку кінцю 2016-го рока вышла в словацькім тлумачіню. Приготовленый є і поетічный вечур з Іґором Латтом, довгорічным актором Театру Александра Духновіча в Пряшові, котрый того року святковав свій жывотный юбілей – 70 років, філмовый вечур, ці далшы події.

Інтересный проґрам чекать на штудентів літньой школы і мімо Пряшова. В рамках тритыжденного курзу увидять Стару Любовню, Камюнку, Червеный Клаштор, Краснобрідьскый монастырь, Музей модерного уменя Енді Варгола в Міджілабірцях і далшы локаліты повязаны із Русинами.

Святочне закінчіня Літньой школы русиньского языка і културы повязане з передаваньом цертіфікатів о абсолвованю курзів вєдно із рецепційов і културным проґрамом одбуде ся в пятніцю 23-го юнія 2017-го року.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА