В Пряшові одбуде ся конференція і далшый семінар карпаторусиністікы

Як іформуює портал rusynacademy.sk, Пряшівска універзіта в Пряшові, Центер языків і култур народностных меншын – Інштітут русиньского языка і културы орґанізує в днях  3-го і 4-го новембра 2016-го року міджінародну наукову конференцію під назвов Дінамічны процесы в сучасній славістіці, яка є присвячена 80-ым народенинам доц. ПгДр. Василя Ябура, к. н., кодіфікатора русиньского літературного языка на Словакії, і 20-ым роковинам заснованя лекторату булгарьского языка на Пряшівскій універзітї.

Конференція буде занимати ся темами: Конфронтачна ґраматіка славяньскых языків, Компаратівны баданя в славяньскых літературах, Актуалны ворпосы словакістікы, русиністікы, булгарістікы і україністікы, Словацька, русиньска, булгарьска і україньска діалектолоґія, Історія словацькой, русиньской, булгарьской і україньской літературы, Шпеціфічны знакы навчаня русиньского і булгарьского языків як чуджіх языків, Сучасный русиньскый і булгарьскый язык, Сучасна русиньска і булгарьска література і Історія Русинів і Булгарів у шыршім контекстї европской історії.

Інштітут русиньского языка і културы Пряшівской універзіты в Пряшові і тот академічный рік продовжує у своїх семінарах карапторусиністікы. Першый тогорічный, цілково вже 37-ый научный семінар карпаторусиністікы, одбуде ся дня 12-го октовбра (середа) 2016-го року о 13.00 год. в засідалні Consilium maius (2. шток, ч. 328) Ректорату Пряшівской універзіты на ул. 17. новембра ч. 15.

З лекціов на тему „Стары і сучасны Булгары…“ у творах Юрія Венеліна – наука і ідеолоґія выступить доц. Др. Страшімір Мітков Цанов із Шуменьской універзіты єпіскопа Конштантіна Преславского в Шумені. В проґрамі семінара буде традічно і презентація найновшых выдань з карпаторусиністікы.

Василь Ябур

Языкознатель і педаґоґ Василь Ябур народив ся 28-го октовбра 1936-го у Стащіні у бывшій Чехословакії. Скінчів Высoку школу російского языка і літературы в Празі (рр. 1954 – 1958), на Універзіті  Коменьского в Братіславі здобыв тітул доктора філозофії (р. 1968), потім тамже кандідата наук (р. 1987) і доцента (р. 1991).

Учів на Педаґоґічнім інштітуті в Кошыцях (рр. 1961 – 1964), Педаґоґічній факулті в Пряшові Універзіты Павла Йозефа Шафарика в Кошыцях (УПЙШ) (рр. 1964 – 1978), Катедрі языків УПЙШ в Кошыцях (рр. 1978 – 1988) і на Педаґоґічній факулті в Нітрі (рр. 1988 – 1993).

Од зачатку 90-ых років ХХ. ст. зачав ся занимати кодіфікаціов русиньского літертурного языка на Словакії. Быв директором Інштітуту русиньского языка і културы при Русиньскій оброді в Пряшові (рр. 1994 – 1995).

Робив у пряшівскій філії Штатного педаґоґічного інштітуту в Братіславі (рр. 1995 – 1998), в тім часі склав проґрам навчаня русиньского языка про основны школы в Пряшівскій области, котрый быв схваленый Міністерством школства Словацькой републікы і заведеный до школ од 1997-го року. Але іщі перед тым у 1995-ім році, вєдно з доц. ПгДр. Юрійом Паньком , к. н., быв головным кодіфікатором русиньского языка на Словакії, святочне выголошіня якого ся одбыло 27-го януара 1995-го року в Братіславі. Од року 1998 доднесь учіть морфолоґію і сінтаксіс у сучаснім Інштітуті русиньского языка і културы Пряшівской універзіты в Пряшові, котрый перешов різныма назвами. Є автором або сполуавтором многых научных публікацій і учебників русиньского языка, інформує далше портал.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА