В Пряшові одбыла ся конференція присвячена Ференцови ІІ. Ракоційови

Як інформовала говоркыня Пряшівской універзіты в Пряшові (ПУ) Інґрід Тімкова, в половині юна 2026-го року на універзіті одбыла ся меджінародна наукова конференція під назвов Civitas Rakocziana.

Конференція, котра была орґанізована із нагоды 350-ой річніці народжіня Ференца ІІ. Ракоція, скапчала вызначных історіків, архіваріусів і фаховців із области културной дідовизны із Словакії, Мадярьска, Чеськой репблікы, Польщі, Україны і далшых країн середньой Европы.

Подію присвячену вождьови повстаня проти Габсбурґів, якый Русинів назвав за їх вірну службу в повстаню gens fidelissima – найвірнішый народ, орґанізовали Пряшівска універзіта в Пряшові, Реформована універзіта Ґашпара Каролі в Будапешті, і Крайскый музей в Пряшові.

Дводньова конференція принесла понад 40 фаховых рефератів, котры принесли новы погляды на особность Ференца ІІ. Ракоція, його протигабсбурзьске повстаня, політічны, реліґійны і общественны звязы 18-го столітя, як і тырваючу културну заповідь той вызначной історічной особности.

Конференцію одкрыв ректор ПУ Петер Коня вєдно із ректором партнерьской універзіты в Будапешті Ласлом Трочанійом.

Проґрам конференції быв розділеный до веце тематічных секцій. Історіци діскутовали о містах і їх ролі почас повстаня, вызначных особностях того періоду, реліґійных обставинах, церьковній історії, културній памяти і образі Ракоція в історіоґрафії ці літературі.

Окрема увага была звернута на новы резултаты баданя архівных документів, діпломатічных односин, воєньской історії, археолоґічных джерел ці іконоґрафії періоду Ракоція. Участници конференції представили і дотеперь мало познаты документы, новы інтерпретації історічных дій, і резултаты меджінародных дослідных проєктів.

Із Ференцом ІІ. Ракоційом суть повязаны і святкованя Русинів у Мадярьску. День Русинів Мадярьска є выголошеный на 22-го мая. В тот день у 1703-ім році Томаш Есе в Береґсасі підняв прапор і залучів підкарпатьскых Русинів до освободженецькой войны Ференца ІІ. Ракоція.

Так само каждый рік в марці святкують Русины в Шарошпотоці при нагоді дня народжіня той вызначной особности, яка записала ся і до русиньской історії.