В Пряшові святочно одкрыли 14-ый річник Studium Carpatho-Ruthenorum

В понедільок 8-го юна 2026-го року в просторах Пряшівской універзіты в Пряшові святочно одкрыли Studium Carpatho-Ruthenorum 2026 – 14-ый річник Меджінародной літньой школы русиньского языка і културы.

Унікатна літня школа, котра як єдина у світі в рамках русиністікы є орґанізована Пряшівсков універзітов в Пряшові – Інштітутом русиньского языка і културы, має тот рік 16 штудентів, котры суть із Споєных штатів Америкы, Чеськой републікы, Україны, Японії, Польщі і Словацькой републікы. Векшыну творять загранічны штуденты.

Дотеперь літню школу абсолвовало 294 штудентів, тогорічны штуденты так звекшать чісло – понад 300 абсолвентів, котры знаня здобыты на тій тритыждньовій школі можуть пак схосновати у своїй професіоналній области роботы, ці при розкрываню свого русиньского походжіня.

Літню школу святочно одкрыв Петер Коня – ректор Пряшівской універзіты. Участь на події взяв і Петро Крайняк – віцепріматор міста Пряшів, котрый так само приговорив ся участникам.

За Інштітут русиньского языка і културы приговорила ся його фахова робітничка Зденка Цітрякова.

Лекції по русиньскы і по анґліцькы

І тот рік суть про участників ку діспозіції лекції на русиньскім і на анґліцькім языку.  Курз історії карпатьскых Русинів веде по русиньскы доц. Володимир Фенич, к. н. із Ужгородьской націоналной універзіты, по анґліцькы Мґр. Томаш Калинич, котрый є докторандом на Карловій універзіті в Празі.

Русиньскый язык по русиньскы учіть ПгДр. Кветослава Копорова, ПгД., унів. доц. з Інштітуту русиньского языка і културы ПУ. По анґліцькы русиньскый язык учіть Мґр. Натан Маркс, Пг.Д., із Оклагомской універзіты в США.

Етноґрафію тогорічны штуденты мають із Мґр. Тімотейом Федором із Музея русиньской културы в Пряшові – по русиньскы, і з Мґр. Катаринов Бабчаковов, ПгД. із Народного освітнього центру, котра має лекції про анґлоязычных участників школы.

Лекції о русиньскій літературі веде на русиньскім языку доц. Мґр. Валерій Падяк, к. н. із Інштітуту русиньского языка і културы ПУ в Пряшові, на анґліцькім языку учіть літературу асоц. проф. Др. Ніколас Купеньскый із Академії авіачных сил США.

Штуденты мають і супроводный проґрам

Три тыждні літньой школы не суть лем о лекціях. Про участників і тот рік є приготовленый супроводный проґрам. Із отцьом Франтішком Крайняком можуть абсолвовати лекцію русиньского літурґічного языка ці літурґічного співу, підуть до Театру Александра Духновіча, СНМ – Музея русиньской културы, будуть мати різны творчі варштаты, підуть і до русиньскых реґіонів, де будуть годны видіти традічну свадьбу, навщівлять і Тополю, де народив ся будитель Александер Духновіч.

І тот рік штуденты підуть і до Польщі – на Лемковину, де в просторах Стоваришыня Руска Бурса в Ґорлицях познакомлять ся із лемківсков културов, роботов радія і порталу lem.fm, а одпрезентує ся їм і дітячій ансамбель Терочка, котрый при орґанізації діє.

Літня школа святочно завершыть ся передаваньом діпломів у пятніцю 26-го юна.