В роднім селі Жатковіча одкрыли памятну таблу

Як інформовав Юрій Шиповіч, голова Русиньского културолоґічного клубу, 3-го децембра 2021-го року на стіні адміністратівной будовы села Голубине, Полянськой сільской рады, была одкрыта памятна табла, котра припоминать, же даный край, з назвов Підкарпатьска Русь, быв у складі Чехословацькой републікы.

Памятна табла была одкрыта в роднім селі Ґриґорія Жатковіча, першого ґубернатора Підкарпатьской Руси, і было так зроблено при нагоді 135-ой річніці його народжіня, котру сьме собі припомянули 2-го децембра.

Табла припоминать Чехословацькый період

На таблі є по чеськы, словацькы і україньскы текст, в котрім ся пише, же в періоді од 8-го мая 1919-го до 29-го юна 1945-го року была теріторія днешньой Закарпатьской области Україны частьов Чехословацькой републікы і мала назву Підкарпатьска Русь.

„При одкрытю таблы выступив Василь Зваріч, заступник головы Поляньской сільской рады, котрый говорив о файных споминах, котры нашы люди сохраняють о многім добрім, што ся зробило ‚за Чехів‘ – розвой економікы, освіты і културы,“ інформовав Шиповіч.

Іван Латко, голова Клубу Томаша Ґаріка Масаріка в Ужгороді, котрый вєдно із Обществом Приятелі Підкарпатьской Руси – Бырно были ініціаторами одкрытя памятной таблы, говорив при тій нагоді о тых културных акціях, котры были зроблены у співпраці з Русиньскым културолоґічным клубом і Обществом імени Александра Духновіча.

Продовжовали округлым столом

По торжественнім одкрытю памятной таблы в адміністратівній будові одбыв ся округлый стіл, котрый быв присвяченый річніці народжіня Жатковіча.

Модератором той події быв доцент Ужгородьсой націоналной універзіты і кандідат історічных наук Михаіл Зан. Участници могли выслухати три реферати. Микола Рішко, краєзнатель і жытель села Голубине, бісідовав о історії родины Жатковічів в контексті історії краю і села Голубине кінця ХIХ. і початку ХХ. столітя.

Павел Худіш із Ужгородьской націоналной універзіты бісідовав на тему Ґригорій Жатковіч і доля Підкарпатьской Руси по Другій світовій войні. Третій выступ мав кандідат історічных наук і експріматор (ексмер) Ужгорода, котрый выступив з темов Незабытны стрічі у місті Корвалліці (США, штат Ореґон) у 1992-ім році.

На події были участны і далшы представителі русиньского руху, як председа Народной рады Русинів Закарпатя Євген Жупан, голова Общества імени Александра Духновіча Юрій Продан, і далшы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА