Голосник

В Розділю одкрыли парусот штук артилерийской зброі з ІІ світовой войны

Боі в рамках ІІ світовой войны обняли такой цілу Лемковину. Видимым є, же фурт мож находити даяку зброю, ґудзикы од мундурів ци інчы річы повязаны з діяльністю войск і партизантів. В селі Розділя, што находит ся в середньо-пілнічній части Лемковины, цілком припадком одкрыли парусот артилерийскых куль.

Нич службы заняли ся зліквідуваньом зброі, дорога, яка веде через Розділя з Ґорлиц ґу Дукли, была даякій час закрыта.

При роботах

Одкрытя выявило ся вчас ремонтовых прац на воєвідскій дорозі но 993, яка веде з Ґорлиц до Дуклі. Оператор копаркы припадком трафил на артилерийску зброю з часів ІІ світовой войны.

Працы при модернізациі того одтинка пути тырвают од парох тыжнів. По днешній ден вшытко ішло згідно з пляном, но в віторок, 29. вересня/септембра 2020 р., оператор копаркы одкрыл близко тридцетцентиметрову кулю. Одраз закликали поліцию і саперскій патроль. Дотля з землі вытягнено парусок штук невыбухів, котры фурт можут быти небезпечны.
Близко 17.00 год. дорога была одкрыта наново для автомобілів. Рух в обі стороны є уж можливый.
Боі в Розділю

Зброя, котру одкопали в Розділю, правдоподібно походит з тымчасового артилерийского становиска. Знатя, што в вересни/септембрі і жолтни/октобрі 1944 р. як раз в околицях Розділя і Криґу стояли німецкы таборы. Хоц быти може кулі походят тіж з дакус скоршого періоду.

ІІ світова война пришла на Лемковину з полудньового боку Карпат. В першых днях вересня/септембра 1939 р. німецкы войска рушыли граничныма просмыками і дорогами через села і міста. Як засвідчают Адам Барна і Федор Ґоч в книжці «Лемкы в борбі за свою і не свою свободу», в першых днях войны траґічный бій на лемківскых землях прошол як раз на пути медже Ґорлицями а Дукльом, в селі Розділя. Быти може неодолга познаме, з котрого точно періоду войны походят речены артилерийскы кулі.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі