В русиньскім реґіоні буде нова природна резервація

На Словакії выникне нова природна резервація Великый Буковець і їй охранна зона. Охранити ся тым мають стары буковы лісы і пралісы Карпат.

Словацька влада 31-го авґуста 2021-го року схвалила выникнутя новой природной резервації. Великый Буковець выникне ку 15-му септембру. Цілкова теріторія новой резервації є 973,97 гектара і находить ся в окресі Снина.

Буде в катастралных теріторіях русиньскых сел Новоселіця, Рунина, Руськый Потік, Руське, Тополя, Уліч Кривый і Збой.

В рамках Великого Буківця будуть дві зоны. В зоні А платить найстрогішый пятый ступень охраны. В зоні Б буде четвертый ступень охраны, де буде мож робити выруб лем выбером і зо згодов орґанізації охраны природы і країны. Охранна зона буде мати 4986,45 гектара і платный в ній буде третій ступень охраны.

„Природна резервація і їй охранна зона є як часть локаліты світовой природной дідовизны UNESCO Стары буковы лісы і буковы пралісы Карпат і іншых реґіонів Европы,“ пише Міністерство жывотного оточіня Словацькой републікы.

В новій природній резервації ся буде хоронити веце сорт лісів, водны жрідла, але і там жыючі, нераз уж днесь унікаты звірята, птахы ці ящуры. В новій резервації суть біотопы европского значіня, котры суть важны про жывот звірят европского і народного значіня.

Жрідло фотоґрафії: nppoloniny.sopsr.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА