В Русиньскій ґрекокатолицькій єпархії в Пармі буде Клокочівска Богородіця

Од 16-го до 28-го септембра 2018 -го року проходить паломництво вірників Русиньской ґрекокатолицькой єпархії в Пармі під назвов Із Маріяповчі до Маріяповчі – паломництво до середньой Европы 2018.

Вірюучі, котрых допроводить їх єпарха, владыка Мілан (Лах), почас тых днів наплановали собі навщівити вызначны місця русиньской церькви в Европі. Значіть місця в єпархіях, котры выникли із матери – Мукачівской ґрекокатолицькой єпархії, яка доднесь, єднако як єпархія в Пармі, є Ватіканом записана як церьков русиньска.

Мадярьско – Словакія – Україна

Путници зо своїм владыком вже навщівили такы міста як Гайдудороґ, Ніредьгаза, Мішколць, в суботу 22-го септембра брали участь на празднованю 200-го юбілею еріґованя Пряшівской єпархії булов Relata Semper в Лютині. В неділю продовжовали свою путь, кедь навщівили Літманову ці Катедралный собор св. Йоана Крестителя в Пряшові.

В понедільок окрім іншого завітали віруючі із Споєных штатів Америкы до Катедралного собору Рождества Пресвятой Богородіці в Кошыцях, днесь мають свій проґрам в Ужгороді і Мукачові. Перед їх навернутьом домів іщі навщівлять маріяньске путницьке місце в мадярьскій Маріяповчі.

Знак єдности русиньской церькви

Почас свойой понедільковой навщівы катедралного собору в Кошыцях віруючі вєдно із своїм єпіскопом і владыком Міланом (Хаутуром), кошыцькым єпархом, помолили ся Молебен до Пресвятой Богородіці. На кінцю молитвы з кошыцькым єпіскопом владыка Мілан подаровав копію іконы Клокочівской Пресвятой Богородіці єпархії в Пармі. Ікону передав їй єпіскопови Міланови (Лахови).

Як інформовав Пресцентер Кошыцькой єпархії (Tlačové stredisko Košickej eparchie), ікона Колокочівской Богородіці буде дана до Церькви св. Марії в парохії Марблгед в штаті Огайо. Ікона має быти подля пресцентру „знаком єдности і звязку Русиньской ґрекокатолицькой церькви на обидвох контінентах“.

„Най хоронить вашы родины в Америці так, як хоронить нашы на Словакії,“ цітовав пресцентер кошыцького єпархіялного єпіскопа Мілана (Хаутура).

Фотоґрафія: Давід Ковач

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА