В Руськім Керестурі одпрезентовали моноґрафію о Русиньскім народнім театрі

В днях 17-го аж 26-го апріля 2026-го року в Руськім Керестурі проходив 58-ый Драматічный меморіал „Петра Ризнича Дядї“. Почас тых днів публіка могла видіти дакілько інсценацій і драматічных колектівів, котры на фестівалі презентовали ся.

Як інформовала аґентура Рутенпрес, послідній вечур меморіалу, неділя 26-го апріля, быв присвяченый презентації моноґрафії під назвов Руски народни театер Петро Ризнич Дядя – 50 роки, автора Дюры Латяка.

Ідея была уж в 2021-ім році

Презентацію одкрыв директор Русиньского народного театру Петро Ризнич Дядя Славко Орос, котрый вечур і модеровав. Як припомянув, ідея, жебы зробити таку моноґрафію і одпрезентовати єй, была іщі в 2021-ім році, коли театер святковав 50 років. Но тот проєкт мусив чекати на реалізацію іщі далшых пять років.

О книжці і їй концепції бісідовав автор – Дюра Латяк, котрый підкреслив, же моноґрафія представлює свідоцтво роботы русиньского театру, яка тырвать пів столітя. Латяк бісідовав о важности театру про народностну комуніту, о фазах і різных статусах того театру, котрыма перешов за 50 років, але і о ентузіазмі акторів, режісерів і далшых особ, котры творили театер, і котрых векшына є спомянута в публікації.

О театрі бісідовала і Іріна Гарді Ковачевіч, русиньска писателькка, яка была в театрі присутна од самого початку. На кінцю приговорив ся за Новинарьско-выдавательску інштітуцію Руске слово, котра є выдавательом публікації, директор Борис Варґа.

РНТ Петро Ризнич Дядя

Руски народни театер Петро Ризнич Дядя є полопрофесіоналным театром войводиньскых Русинів. Його початкы суть повязаны із выступлінями на драматічных меморіалах од 1969-го року. Назву має по русиньскым театралнім діятельови із початку 20-го столітя. Офіціално як аматерьскый театер быв основаный у 1970-ім році.

У 2003-ім році часть театру была трансформована на професіоналный Руски народни театер Петро Ризнич Дядя. Театер за 50 років одпремєровав много пєс містных войводиньскых русиньскых драматурґів, але і класіку світового репартоару.

Фото: Рутенпрес.