В сканзені в Бардейовскый Купелях почала велика реконштруцкія

Шарішскый музей в Бардейові, котрого зряджовательом є Пряшівскый самосправный край (ПСК), почав реконштрукцію свого сканзену в Бардейовскых Купелях. Інформовало о тім Одділіня комунікації ПСК.

Проєкт під назвов Музей – мій часопростор реалізує музей із польскым партнером, котрым є Музей ремесел в Коросні, в рамках проґраму Interreg Польща – Словакія 2021-2027 із бюджетом майже 4 міліоны евр. На словацькый бік граніці іде 1,9 міліона евр, найвызначнішу часть інвестіцій притім творять еврофонды, котры суть доповнены державныма фінанціями, а так само грошами з розрахунку ПСК.

„Цільом европроєкту є заховати културну дідовизну, укріпити роль културы і утримательного турістічного руху в господарьскім розвитку, соціалній інклузії і соціалных іноваціях в польско-словацькім пригранічу, а в непосліднім шорі підняти атрактівность Шарішского музея,“ інформовала пряшівска жупа.

Проєкт в сканзені є заміряный на ставебно-технічну обнову обєктів, котры ся в нім находять. В Бардейовскых Купелях ся буде робити на 20-ох обєктах – семох хыжах, двох деревяных храмах, двох сыпанцях і дзвоніцях, ковальскій шмыкні і далшых. Реконштрукційов перейде і гоблярьска майстерня, в котрій выникне новый выставно-едукачно-презентачный простор.

Закінчіня проєкту Музей – мій часопростор є наплановане на юн 2026-го року. Почас робот буде сканзен одкрытый, обмеджена буде часткового лем тота часть, в котрый актуално буде проходити реконштрукція.

Сканзен в Бардейовскых Купелях, котрый тот рік святкує 60 років од одкрытя, є єднов із найстаршых експозіцій народной архітектуры на Словакії. На 1,6 гектара є 31 експозічных обєктів, переважно із 19-го і 20-го столітя, котры презентують народну културу і будованя словацького і русиньского населіня в реґіоні Вышнього Шаріша і Северного Земпліна.