В Старій Любовні припоминають жертвы голокавсту дві коцкы

В пятніцю 5-го марца 2021-го року на Намістю св. Николая в Старій Любовні в рамках проєкту Stolpersteine осадили дві камянны коцкы, котры суть присвячены жыдівскій родині Блаєровых.

Проєкт реалізованый в многых европскых містах має припомянути жертвы голокавсту і місця, де жыли. Інформовав о тім аґентуру TASR выконный директор Областной орґанізації турістічного руху Северный Спіш – Пєнины Якуб Ондрей.

Родина Блаєровых была в меджівойновім періоді маїтельом Провінчного дому, в котрім є днесь містьска ґалерія. В місті мали і друкарню. Тота была арізована уж в 1940-ім році. Памятны коцкы были осаджены на місці, де родина жыла, причім суть присвячены конкретно Анні Блаєровій і їй сынови Елемерови Блаєрови, котры вмерли в концентрачнім лаґрі.

„О жывоті і траґічных історіях Жыдів нелем в Старій Любовні, але і в реґіоні северного Спіша а Пєнин знають люди лем мало. З цільом підняти свідомость людей о тій вызначній ґрупі любовняньской сполочности, пришло обчаньске здружіня UM UM у співпраці із словацьков орґанізаційов Antikomplex і німецькыма партнерами, з пропозіційов реалізовати німецькый проєкт Stolpersteine,“ повів Ондрей.

Тот за його совами приносить комплексный концепт осаджованя золотых (бронзовых) камянных коцок з розміром десять на десять центіметрів на місцях, де жертвы голокавсту жыли. Цільом проєкту є бойовати проти ксенофобії і расовой ненависти.

Жыдівска реліґійна общіна выникла в Старій Любовні в половині 19-го столітя, но пізніша арізація маєтку і депортація до концентрачных лаґрів запричінили їй цілкове заникнутя. У 1942-ім році было в окресі Стара Любовня транспортованых до зберного лаґру в Попраді і пізніше до концентрачных лаґрів 643 із цілковой кількости 732 Жыдів, причім были майже вшыткы коротко по приході забиты.

Жрідло фотоґрафій: FB/Stará Ľubovňa.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА