В Сярах будут робити історичный парк, але выйде дорожше, як закладали

В ґміні Санкова в місцевости Сяры будут робити історичный парк. Як раз закінчыл ся конкурс оферт оголошеный урядом пару тыжнів тому. Ґміна рыхтує ся підписати догваріня з выконавцьом. Уж знатя, што треба буде доложыти до плянуваной квоты.

В ґмінным уряді розвязали конкурс оферт на выконаня історичного парку в Сярах. Тота нова атракция для жытелів і туристів буде мала пару секторів. Єден з них дедикуваный буде смыслам, з сенсоричном стежком, едукацийным ґратьом, музичныма артефактами, будками для птахів, насаджынями ідальных рослин, малом архітектуром. Елементом паркового пейзажу має быти тіж тривымірова макєта ґміны Санкова.

На оголошыня ґміны одповіли штырі фірмы, з обшыри повіту, як і дале з Польщы – з Бобовы, Старого Санча, Паршова і Люблина. Ріжниця медже найдорожшом а найтуньшом офертом была барз велика – оферты были од 6,3 млн зл до 3,2 млн зл, а ґміна плянувала презначыти на задачу 2,3 млн зл. Уряд рішыл приняти найтуньшу оферту, хоц буде мусіл доложыти іщы коло 900 тис. зл.

«Неодолга будеме оголошувати конкурс на природничу част, в котрій плянуєме м.ін. став і пляжу» – подає війт ґміны М. Малух.