В Ужгороді друком вышла пєса Андрія Бродія

В ужгородьскім выдавництві Валерія Падяка в тых днях вышла пєса Шпекуланты Андрія Бродія, котрого знаме головно як єдного із найвпливнішых політічных діятелів Русинів 1920-ых аж 1940-тых років.

Выдавництво театралну пєсу Бродія выдавало як четверу книгу едіції Русинське факсіміле. В тій едіції вже вышла пєса Александра Духновіча ДобродѢтель перевышаєтъ богатство, театралный твор Йосифа Кизака Свадьбой начинается и свадьбой кончится і драма авторьской двоїцї Владимір Грабарь і Михайло Луґош під назвов Овчарь. Тексты выходять в оріґіналі, обогачены на кінцю публікації суть все доповнючіма статями Валерія Падяка, котрый є і педаґоґом на Інштітуті русиньского языка і културы Пряшівской універзіты в Пряшові.

Політік і писатель

Андрій Бродій (1895 – 1946 рр.) є знамый як ведуча особность політічной партії Автономный земледѢльскій союзъ. На короткый час по Мніховскім договорі у 1938-ім році став Бродій премєрміністром автономной влады Підкарпатьской Руси.

Жывот вызначного русиньского політіка і писателя скінчів ся траґічно, коротко по тім, што Підкарпатьску Русь анектовав Совітьскый союз. Бродій, так як і десяткы далшых політічных, церьковных і общественных діятелів, быв одсудженый на смертну кару. Проти його особы были выфабрикованы обвиніня і його творчость была на довгы десяткы років вдяка КҐБ табу, інформує выдаватель.

„Аж теперь літературна творчость вызначного вождя русиньского автономізму Андрія Бродія приходить до чітателя. Комедія «Шпекуланты» (в русиньскім языку) была написана уж в далекім 1930-ім році і выдана як окрема книжка у 1932-ім році,“ пише Падяк. Як припоминать, і тота пєса выходить із ґрунтовым історічно-літературным коментарьом із його пера.

Падяк творчость Бродія уже скоріше высоко оцінив у своїй публікації Історія карпаторусинського національного театра і драматургії, котра вышла у 2018-ім році в Пряшові. Шпекуланты Бродія суть вже теперь рекомендованов пєсов про штудентів русиністікы як навчалный текст при навчаню літературного процесу меджівойнового педіоду.

Пєса о контрабанді є актуална

Андрій Бродій, за словами Падяка, підняв у своїй пєсі Шпекуланты єдну із вічных тем – контрабанд.

Кедьже є сучасна Закарпатьска область Україны пригранічным крайом, автором оброблена проблематіка, котров є контрабанд циґарет, є цалком зрозумілов темов про обычайного жытеля той области, думать Валерій Падяк. Комедія Шпекуланты вказує на то, як жыло карпаторусиньске село на початку 1930-ых років, іронізуючі то, што робили містны шпекуланты і контрабандісты.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА