Краківскій Музей Сучасной Штукы МОЦАК, разом з Народовым Старым Театром ім. Г. Моджеєвской, одкрыват новий простір в рамках свойой колекциі. То інтерактивна інсталяция Кристияна Люпы – Live Factory 2, збудувана на основі сценоґрафіі до його пєсы Factory 2, котрой премєра одбыла ся в 2008 р. Тым способом буде мож войти в робочу обшыр, намацяти стіну і меблі, спочнути на Варгольовым сідиску і обізріти награня з варштатів, котры проходили перед премєром пєсы.
Концепция К. Люпы односит ся до срібного періоду Фактори (Factory) – то культове місце, основане в Ню Йорку Е. Варгольом. Стрічали ся гын найвыдатнійшы артисты, музыкы і акторы світа. Был секс і наркотикы, але, очывидно, не тото было найважнійше. Місце служыло максимальному однятю загамувань і упереджынь, жебы досягнути найбарже глубокє освободжыня. Жытя в Фактори было постійным перформансом, в котрым каждий давал вершыну свойой індивідуальности. Варголь был участником тых акций, але предовшыткым смотріл і знимал фільмы.
Люпа пішол з тым експериментом іщы дальше, заміняючы фізичны спомагачы на символичны наркотикы. Разом з ґрупом акторів, основал Фактори в Кракові. Ґу тому треба было познати історию нюйоркского студия, обізріти фільмы, жебы потім зачати свою акцию, коментувати тамты подіі, ідентифікуючы ся з тамтыма героями, што наконец дало змогу ся од них одріжнити і вказати ся інакше. Зродил ся з того свобідний, одограний вельо раз гепенінґ, котрий дозвалял акторови на полну свободу, самостійно творячому свою ролю. Люпа, позераючы на розвиваючу ся форму, сам являл ся участником акциі. Конец-кінців, коли уж взріл єй полну подобу, затримал героів, іх ролі і ґесты. Результатом того єст спектакль, котрий в деякій мірі сам ся сотворил.
Участникы нюйоркского Фактори з цікавістю позерали на експерименты Люпы. Декотры з них пришли до Кракова та, як доказ апробаты, підписали ся на стінах, будучых декорацийом спектаклю.
Артистична стріча Люпы з Варгольом никого не чудує, понеже іх психолоґічны профілі подібны. Оба характеризуют (характеризували) ся поверховом лагідністю, котра придає одвагу, осмілят інчых, помагаючы полністю взріти другого чловека. В обох же чловек являт ся джерелом знань. І єден, і другій єст (был) – свобідно, ачий радістно – доцяп вірний своій незалежности і артистичным концепциям.
Вернісаж выставы Live Factory 2: Warhol by Lupa одбуде ся 14. марця 2016 р. в Краківскым Музею Сучасной Штукы МОЦАК о 18.00 год.
Джерело: пресовы материялы.
Коментарі