Варгольовы творы выпродаваны з колекциі звізды Голивуд

Што якісий час до світа выходят інформациі, што творы короля поп-арту сут продаваны на аукциях або тілько што вказуваны до денного світла, вынаходжены в приватных колекциях. Остатнім часом Лайза Міннеллі зачала выпровадавати особисту колекцию Варгольовых серіґрафік.

Лайза Міннеллі менувана є як звізда «старого Голивуд». То дівка акторкы Джуді Ґарленд і режысера Вінсента Міннеллі. Дорастала серед найвекшых целебритів, познаючы закрытий перед простыма людми світ америцкого Голивуд. Днес Міннеллі має 72 рокы. Як доносят світовы аґентуры, акторка терпит на обсесию про свою смерт. Боіт ся, же скоро вмре. Має депресию, котрій товаришыт долгорічне хоснуваня наркотиків. Прото і рішыла выпродати цілу свою колекцию, котру через рокы зберала не лем она, але предовшыткым єй родиче.

Першы пляны выпродати зобрану колекцию вышли до світа перед двома роками. Акторка хотіла продати цілу свою колекцию за 40 мнл дулярів, але товды не нашол ся нихто охочий. Знавці анонсуют, што вартало ждати доднес, прото што вартіст Варгольовых робіт збільшыла ся парукратно. Образ представляючий матір – Джуді Ґарленд, был перед парома днями проданий за близко 7 млн дулярів. В колекциі находят ся іщы три інчы портреты матери, штырі самой Лайзы та портрет єй вітця, котры перед роками выконал Енді Варголь. Найпевнійше внет і они будут выставлены на аукцию.

Вельо з Варгольовых творів прикрашало апартамент Міннеллі на Мангатані, але коли переносила ся в 2015 р. до Беверлі Гільс, част продала уж товды. Міннеллі познала Варголя не в його славным ателє Factory, а в клюбі Studio 54 в 70. роках минулого ст. Oд того часу были близкыма приятелями. Част образів акторка достала як подаркы од Варголя, а част звычайно придбала.