Великє Одкрываня Малопольщы: Новиця потрібує нашых голосів

До 7. вересня/септембра 2018 р. мож голосувати в плебісциті Великє Одкрываня Малопольщы. To інтернетовий конкурс, орґанізуваний «Краківском Ґазетом», в котрым мож оддавати голосы на найбарже інтересуючы, вартістны і найпопулярнійшы туристичны атракциі і подіі Малопольщы та вынятковых люди, якы мают влияня на туристичний розвиток того реґіону. В тогорічній едициі акциі стартує популярне на середній Лемковині село Новиця.

В ХІХ едициі воєвідского плебісциту орґанізаторы, слідом попередніх років, выокремили пару катеґорий, в котрых стартуют поєдны зголошены підметы. Мож давати голосы м.ін. на шумне місце, найліпшу туристичну атракцию, подію з реґіону, смачну і традицийну корчму, готелі ци аґротуристичны ґаздівкы. Од років о першы місця в плебісциті старают ся люде ци подіі звязаны з Лемковином і Лемками. Не інакше є і тепер, за справом Новиці – лемківского села, якє од років притігат свойом ориґінальністю.

Єм ту шолтысом, веду тото село. Влони тіж брали сме участ в плебісциті, але достали сме лем оцініня. Но, а в тым році хтіли бы сме побороти ся, жебы повело ся нам здобыти тото перше місце і взяти нагороду – повіл Петро Михняк, шолтыс Новиці.

Новиця стартує в катеґориі «Неповторне Місце». Конкурує з інчыма малопольскыма місточками і селами. На днес щестливо є перша в реченій катеґориі, маючы уж більше як 250 одданых голосів. Хоц до кінця голосуваня такой іщы тыжден, поінчы рокы вказуют, што правдива борба на голосы пройде правдоподібно в послідній ден, т.є. 7. вересня/септембра. Тым більше треба підпорити своіх, прото што уж нераз фавориты были перебити через другых кандидатів.

Петро Михняк знає, як цінна была бы выграна його села в плебісциті. Головна нагорода то 50 тисячы золотых, мали бы сме на што тото перезначыти, якісы такы малы думкы маме. Іщы тепер не здрадиме, на што бы сме хотіли передати тоты грошы, як буде вшытко выгране, то товды выявиме – продолжал Михняк.

Новиця притігат свойом неповторністю не лем приіздных, але і самых Лемків. В селі мож видіти штораз рідше стрічану традицийну лемківску забудову, хыжы, на котры днешні жытелі дбают і іх реставруют. Як ся так переіхат през Новицю, то ся тых старых хыж нарахує іщы гідні, но але іщы маме дві церкви і каплицю, барз добрі захованы. Маме осередок Сарепта, в котрым м.ін. пише ся два-три раз до рока іконы. О пару дни зачынат ся медженародний табір писаня ікон (…) – дополнял в бесіді з нами шолтыс.

Новиця є векшым селом як колиси. Днешня то не лем обшыр передвоєнной Новиці, але тіж причыслений до ней поблизкій Прислоп, будучий перше окремым селом. Прото днес новичане мают аж дві церкви, в котрых сут правлены грекокатолицкы богослужыня – єдну новичаньску, а другу з давного Прислопа.

Новиця то важний пункт на мапі Лемковины. В селі народил ся Богдан Ігор Антонич, поета творячий в украіньскым языку, якій своі вершы інспірувал м.ін. красом рідного села.

Михняк, окрем того же полнит фукнцию шолтыса села, занимат ся і вырабляньом деревяных лжыц. Довыселенча Новиця была знана як раз з той професиі, котра приносила єй жытелям можніст заробити. Традицийны лемківскы лжыці, але тіж ґонты і інчы деревяны нарядя сут експортуваны далеко поза границі Лемковины. Так як колиси, і днес істнує запотребуваня на того рода выробы. В родині Петра Михняка знаня професиі передаване є з поколіня на поколіня. Його няньо ай дідо трудили ся лжыцями. І він має надію, же внет декотрий з його сынів перейме сес родинний фах.

На Новицю мож голосувати до пятниці, 7. вересня/септембра 2018 р., до 21.00 год. Старчыт пустити відоміст SMS на номер 72355, зо змістом WOMMN.16. Актуальны результаты голосуваня мож слідити за мотузком.