Вельокультуровий Календар 2017

Вказала ся шеста едиция Вельокультурового Календаря на 2017 рік. Започаткувана в 2012 році публикация ґрафічным дізайном та змістом навязує до передвоєнных галицкых календарів.

Ідейом, яка присвічат печатаню того выдавництва, єст пошана для культуровой та реліґійной ріжнорідности. В календари поміщено прото… три календарі: григоряньскій, юлияньскій і жыдівскій. Зазначено на них свята і торжества, важны для даной реліґіі ци обряду. В публикациі поміщено м.ін. архівальны знимкы і зодіакальний каленадр. Зодіакальны пророцтва были взяты з публикациі з 1933 р. пн. «Астролоґічны пророцтва старых календарів і місячны приповісти, а листа імен на даний ден походит з «Історично-туристичного Календаря і Климатичного Путівника на 1934 рік».

В трьох першых едициях календаря мож было почытати описы католицкых і жыдівскых свят. Два наступны посвячено галицкым містам, з особливым натиском на люди, котры в тых містах жыли. В шестій – актуальній, авторы едициі просят на вандрівку путьом популярных курортів, якы находили ся в полудньовх воєвідствах ІІ Річпосполитой – м.ін. до Крениці, Івонича, Рыманова, Жеґєстова, Рабкы, Яремчы, Трускавця, ци Косова. Тоты купелі конкурували зо собом в 20. роках ХХ ст. та з найліпшыма заграничныма осередками, ци то під взглядом климату ци лікуючых прикмет мінеральных джерел. Тексты о курортах опрацувано на основі Туристично-Здройового Путівника, печатаного 1934 р., та Альбому Польскых Курортів, друкуваного во Львові в 1937 р.

Календар, за думками теперішніх його выдавців, єст символом минулой епохы і свідоцтвом єй вельокультуровости, котру окрутні закінчыла ІІ СВ.

Календар на 2017 рік в папірьовій версиі мож придбати сой на сайті kalendarz.izbapamieci.org.pl, або побрати дармо в діґітальній версиі.