Вігорлатьскый музей одкрыє Карпатьску писанку 2025

Вігорлатьскый музей в Гуменнім у співпраці з Окреснов орґанізаційов Унії жен Словакії в Гуменнім приготовив вже XXXIII. річник музейной презентації писанкарьской традіції і кумшту карпатьского реґіону Карпатьска писанка 2025.

Вернісаж Меджінародной конкурзной выставы Карпатьска писанка 2025 одбуде ся 20-го марца в Ґалерійній салі Ореста Дубая Вігорлатьского музея. В рамках одкрытя выставы одбуде ся і выголошіня а нагороджіня переможців конкурзной части.

Як інформовав Вігорлатьскый музей, в рамках XXXIII. річника Меджінародной выставы писанок буде выставленых 575 експонатів. До актуалного річника приголосило ся 61 змагаючіх ся із Словакії, Польщі і Україны. Найвеце колекцій є з реґіону выходной Словакії, вісем колекцій репрезентує западну Словакію, загранічных участників конкурзу заступають дві колекції з Польщі, і дві колекції з Україны.

„Представленых є майже десять найпознатішых творчіх технік крашіня яєчок, од стародавных по недавно розшырены,“ інформує музей. Писанкы буде мож видіти нелем із яєчок од куркы, але і од качкы, пулькы, гускы, ці такых екзотічных птахів як ему.

Нагороджены колекції писанок, як і решту писанок будуть годны навщівници Вігорлатьского музея видіти до 27-го апріля того року. В рамках Карпатьской писанкы 2025 музей приготовив і супроводный проґрам. В штирьох термінах будуть в музею проходити творчі варштаты з писанкарьства, музей рихтує і ярмарок писанок.

Фото: Pixabay.com.