Голосник

Віртуальны Гушлі – Фолькова платня 2015 рока – зачало ся голосуваня!

Днес в само полудне зачало ся голосуваня інтернавтів на найліпшу фолькову платню Віртуальны Гушлі 2015. В плебісциті участ берут платні з фольковом, етнічном та корінном музыком, печатаны в Польщы в 2015 році.

Орґанізатором конкурсу єст ґрупа любителів етнічной і фольковой музыкы, яка зосереджат ся попри порталях і інтернетовых сайтах, посвяченых того рода музыці. Голосуваня проходит на специяльні до того зрыхтуваным сайті www.gesle.folk.pl, на котрым находит ся листа принятых до плебісциту платен. Голосувати мож лем єден раз на єдну платню, а додатково мож выріжнити іщы 4 інчы. Окрем того заголосувати мож на найцікавшу окладинку презентуваных кружків.

Серед артистів і музычных ґруп, якы по інчы рокы брали участ в конкурсі, а на іх платнях почути мож лемківску музыку, то м.ін.: Оркєстра св. Миколая, Черемшына, Сусанна, Відимо, Гудаци, Анджеля Ґабер Тріо, Персіваль і інчы. Того рока голосами сперти мож м.ін. такы ансамблі і іхні платні:

  • Серенча, Ой ле лем

Платня Ой ле лем то четверта пропозиция Серенчы на вказаня забытой, народной лемківской музыкы в чысто новых, свіжых, сучасно-фольковых, приємных, а тіж часом – заскакуючых аранжациях. Пісні походят зо співника Філарета Колессы з 1929 рока. Выбрано з них єденадцет – співаных в околицях Панкной, Маластова, Устя Руского. В співанках почути мож традицийны звукы сопілкы, гушель ци гармоніі, сут тіж бубны, басы, ґітара, мандолина, а навет ліра. А моментами слухач мат вражыня, же переносит ся в еґзотику далекого сходу, здає ся, же то за справом такой а не інчой мельодикы, ци такой а не інчой ритмікы…

  •  Там на горі черешенька

Платня Там на горі черешенька презентує награня з тереновых досліджынь професора Романа Райнфуса, веденых на Лемковині в 60. роках ХХ ст. Почути мож співанкы, якы товаришыли Лемкам при ріжных роботах, святах, або стрічах, але сут тіж фраґменты выповіди м.ін. про страхы, весіля, вечыркы і мазярскы закликы. Платня печатана была Фундацийом Стара Дорога, а награня походят з архіву Стоваришыня Народных Творців в Люблині.

  •  А Де То Давнійше Строіло, Хыжа

Ансамбль А Де То Давнійше Строіло, то молода ґрупа основана в Коросні 2013. Грают фольково-рокову музыку, оперту м.ін. о лемківску корінну творчіст. Выберают співанкы, котрых уж ся не співат, але і такы, якы мож іщы почути даде на Лемковині. На дебютантскій платни Хыжа находит ся 12 популярных в обшыри Низкого Бескіду співанок, м.ін. А чыя-ж то хыжа, Іванку, Іванку, Вино червененькє, ци Ой, верше мій, верше.

Голосувати мож до пілночы 30. квітня/апріля, а оголошыня результатів – 10. мая 2016 р.

Adobe Photoshop PDF

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі