Влада у Свіднику роздільовала грошы. Дали і на ансамбель Маковіця

У віторок 18-го септембра 2018-го року у Свіднику проходило выїздове засіданя влады Словацькой републікы під веджіньом премєра Петра Пеллеґрініго. Ішло о третє выїздове засіданя в місті під Дукльов. Двараз, у 2009-ім і 2016-ім році там засідав кабінет премєра Роберта Фіца.

Словацька влада розділила почас засіданя 1,25 міліона евр. Іде о средства із бюджетовой резервы про окрес Свідник, котрый належыть меджі найменше розвинуты на Словакії, інформовала словацька державна пресова аґентура TASR.

250 тісяч навеце про Ґірлатівці

Влада звычайно розділює міліон евр в рамках выїздовых засідань. У Свіднику тоту суму підняли о 250 тісяч, котры мають іти місту Ґірлалтівці.

Як повів премєр Пеллеґріні, пріматор Ґіралтовець інформовав владу, же з причіны маєтково-правных обставин ся не подарило в місті почас попередніх років добудовати протиповодньову охорону. Кедьже місто уж до той сістемы інвестовало великы грошы, дотації уж ішли і од влады, кабінет у Свіднику вырішыв дати Ґірлатівцям далшых 250 тісяч на добудованя розробленого проєкту. Ґірлатівці окрім того здобыли фінанчны средства в сумі 143 тісяч евр на три далшы проєкты.

У Свіднику грошы і про Маковіцю

В окресі Свідник підуть з міліоновой резервы грошы наприклад про церькви, жебы могли зреконштруовати дакотры части свого маєтку.

„Самособов, не забыли сьме ани на фолклорный ансамбель, котрый нас привітав при приході на засіданя влады, бо святковав округлый юбілей і заслужыть собі так само дотацію од влады на матеріално-технічне забезпечіня,“ повів по їднаню на пресконферецнії Пеллеґріні.

Бісіда є о фолклорнім ансамблі Маковіця, котрому влада приділила 5000 евр. „Лем в дітячій части ансамблю має 150 малых дітей і за то му належыть велика подяка, же малы діти, молоду ґенрацію веде ку всокочіню нашых традіцій, доповнив премєр.

Найвекшым приїмательом буде місто Свідник, в котрім ся будуть наприклад реконштруовати драгы. 34 тісяч евр влада схвалила на выбудованя дітячого грища, суму 20 тісяч здобыв містный шпыталь на то, жебы могли купити ся новы постелі про паціентів. На реконштруцкію своїх обєктів здобыли грошы і дакотры села реґіону.

В окресі уж выникли новы робочі місця

В окресі Свідник выникло од наштартованя акчного плану про найменше розвинуты окресы на Словакії з підпоров реґіоналной дотації і европскых штруктуралных фондів 638 робочіх місць. За словами словацького премєра є амбіційов досягнути до 2020-го року чісло 1418.

Окрес Свідник, в котрім є много русиньскых сел, має теперь безробітность коло 12 процент, причім в цілім Пряшівскім краю, де жыє найвеце Русинів на Словакії, є безробітность коло 9-ох процент і середнє чісло безробітности в рамках цілой Словакії є 5,47 процента.

Премєр у Свіднику інформовав, же влада роздумує і о можливій підпорі інвестора, котрый хоче прямо в місті реалізовати выробу куфрів і вытворити далшы робочі місця. Підпора державы бы в тім припаді могла быти в сумі 430 тісяч евр. Пеллеґріні видить потенціал і у свідньцкій фірмі, котра занимать ся выробов контайнеровых будов. Тота подля слов премєра пожадалиа владу о поміч при накупі новой тяжкой технікы. Актуално давать роботу веце як сто людям.

Пополідне мав каждый міністер напланованый свій проґрам у Свіднику. Премєр ся стрітив із старостами выбраных сел окресу.

Жрідло фотоґрафії: TASR

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА