Владимір Хыляк – до даты смерти і народжыня

Предвчера проходила річниця смерти, а днес проходит річниця уродин Владиміра Хыляка – выдатной лемківской особливости, писменника, фельєтоністы, публицисты, соспільного діяча, пропаґатора Лемковины і, вкінци, священника.

Вродил ся Владимір Хыляк 27. липця 1843 рока в родині о. Ігнатия Хыляка, священника Верхомли Великой. Мати Владиміра, Євфрозина, была дівком пароха з Верхомли – о. Івана Париловича і Домітелі Чырняньской. Владимір мал трьох братів, якы тіж были священниками на Лемковині, а і сестры вышли замуж за священників, якы душпастырювали на Лемковині.

Коли Владимір мал два рокы, вмерла му мама. По скінчыню місцевой основной школы, науку продолжал в ґімназиі в Новым Санчы, а пак в Пряшові. Теолоґічны студиі піднял на львівскым університеті, одкале перенюс ся до духовной семінариі в Перемышли. Перед высвячыньом, якє принял в 1886 році з рук Бортнянина, перемышльского владыкы Томы Поляньского, оженил ся з Анґеліном, дівком Петра Дуркота, пароха Ізб. Першом парафійом В. Хыляка были Долины к. Шымбарку. По смерти свекра в 1868 році, перенюс ся до Ізб, де душпастырювал до 1870 рока. Пак трафил до Бортного. Мал 9 діти.

Окрем цвященничой послугы, о. Хыляк діял соспільні, вюл едукацийну діяльніст. Два рокы по обнятю парафіі в Бортным, літерацко дебютувал оповіданьом печатаным во Львові під назвом Польскій Патріот. Публикувал  повісти, оповіданя, спомины, етноґрафічны ескізы, фельєтоны, байкы, гуморескы і інчы, в вельох галицкых ґазетах і часописах. Писал під ріжныма псевдонімами: Іеронимъ Анонимъ, В. Неляхъ, Лемко, Лемко-Семко, Нѣкі, Quidam. Был найбарже ціненым в старорускых кругах галицкой інтеліґенциі писательом в другій половині ХІХ столітя.

Найпопулярнійшым твором В. Хыляка остає повіст Шыбеничний Верх, яка тыкат ся часу 60. і 70. років XVIII ст. і того, што в тым часі діяло ся на Лемковині (стацийонуваня барскых конфедератів в околоцях Ізб) і як тота Лемковна выглядала – головні в єй культуровым, духовым та ґеоґрафічно-просторовым аспекті. Два рокы тому Стоваришыня Руска Бурса перепечатало повіст В. Хыляка в рамках сериі «Бібліотека Лемківской Клясикы». Минулого рока, в другым томі посвяченым тврочости Хылака, выдано наступны оповіданя. В плянах єст выданя іщы двох томів «Повісти і оповідань» (вшыткых буде штырі). Обі книжкы можете пожычыти в Бібліотеці Руской Бурсы, або придбати сой на нашым сайті (за тым мотузком).

Владимір Хыляк, клясык лемківской літературы, вмер 25. липця 1893 рока в Літині к. Дрогобыча (де остал перенесений в 1892 році).