Владыка Масцюх в Саноку – Йордан 1935

В ріжных выданях ци в інтернеті натрафити мож на знану фотоґрафію, яка представлят святкуваня Богоявліня в Саноку. Знимка датувана є на 1935 р., а в центрі той фотоґрафіі находит ся першый владыка Апостольской Адміністрациі Лемковины, др Василий Масцюх.

Потверджыньом представленого на знимці образу сут архівны оголошыня і статі, до якых трафили сме, перезераючы выданя ґазеты «Лемко» за 1935 р. Нацийональный Цифровый Архів переховує і дальшы фотоґрафіі з Водокрещыня на Сані з дня 19. січня/януара 1935 р.

Владыка Масцюх на свято Йордану в 1935 р. приіхал до Санока, жебы гын на ріці Сан освятити ритуально воду. Подія тота была шыроко коментувана і в товдышніх лемківскых медиях. Ґазета «Лемко», ч. 3 (38) (четвер, 17. січня/януара 1935 р.), публикувала специяльне повідомліня на торжественне святкуваня Богоявліня в Саноку.

В дальшым выданю ґазеты «Лемко», ч. 4 (39) (четвер, 31. січня/януара 1935 р.), нашла ся реляция з подіі. Долов приносиме ціліст в ориґінальным правописі.

Сянок, столица Лемкoвщины, витал в своих мурах Достойного Гостя, Апостольского Администратора Лемковщины, Ексцеленцию О. Д-ра Масцюха.

Приізд тот стягнул до Сянока величезны лагы народа зо вшиткых закутин Лемковщины, котры приіхали помимо мороза и вітерницы, щтобы привитати и поклонити ся своєму владыці.

Дня 18. т. м. на желізнодорожной стации в Сяноці повитали Достойного Гостя масы  народа, администрацийны и войсковы власти и репрезентации лемковскых обществ. По повитаню заіхал Ексцеленция до Руского Народного Дома в Сяноці, где в его честь устроєно традыцийну передйорданску вечеру, в часі котрой участники провели мило час, слухаючи коляд и народных пісень, отспіваных артыстычно через сяноцкый хор под умілом батутом г-на Поделинского. Около 11-той годины Владыка попрaщал собраных коротком бесідом, в котрей поднюс, же по 240 літах Сянок, яко давна столица епископска, достає зас владычий престол в тых часах, коли общий труд, стремячий до успокоеня мас, до усуненя меджеусобиц и запанованя згоды и братской любови єст конечно потребный.

Слідуючого дня отслужил Владыка торжественну литургию з парохияльной церкви в Сяноці и торжесевенне водосвятиє на Сяні, а вечером присутствовал на концерті, в салі Народного Дома, даном через хор из Крыницы, котрый отспівал ряд чудовых коляд и пісень с такым искуством, же громкым руколжеланям не было конца.

По концерті и попращаню Владыкы отбыла ся в той же салі забава з танцами, котра продолжала ся до поздней ночи. Участникы, довольны успіхом и жиючи надеждой, што наближат ся час, коли наши церковны преповідальницы начнут зас, голосити слово Боже и науку Христа и перестанут быти трыбунами политычных бесід, долго ділили ся медже собом милым впечатленєм, выкликаным тым першим торжественным выступом Руского Владыкы.

фот. Нацийональный Цифровый Архів