В понедільок 20-го юла 2020-го року Ватікан оголосив, же Папа римскый Франціск призначів владыку Ніла Лущака, помічного єпіскопа Мукачівской ґрекокатолицькой єпархії, за апостольского адміністратора єпархії ad nutum Sanctae Sedis (до одкликаня Святішым престолом).
О призначіню інформовав портал Vatican News. Владыка Ніл быв выменованый за адміністратора єпархії по смерти єпархіялного єпіскопа – владыку Мілана Шашіка, котрый наглі вмер з причіны тромбозы 14-го юла. Якраз в день його похорону Святішый престол вырішыв о дочаснім повіріню справованя єпархії.
Владыка Ніл Лущак
Ніл Юрій Лущак, ЧМВ (Чін меншых братів францісканів), народив ся 22-го мая 1973-го року в Ужгороді. Теолоґічну і духовну формацію здобыв в Ужгороді і у 1996-ім році быв рукоположеный на священика. Слідуючі рокы робив душпастыря у веце парохіях Мукачівской ґрекокатолицькой єпархії.
В роках 2004 – 2008 штудовав на Папскій Урбановій універзіті в Римі, де здобыв ліценціат із філозофії. У 2009-ім році вступив до новіціату Чіну меншых братів францісканів, де дістав монашеске мено Ніл. У 2010-ім році зачав передавати філозофію на Ужгородьскій ґрекокатолицькій духовній академії ім. Теодора Ромжы. У 2012-ім склав вічны обіты.
За помічного єпіскопа Мукачівской ґрекокатолицькой єпархії быв выменованый Папом римскым Венедіктом XVI. 19-го новембра 2012-го року. Рукоположеный на єпіскопа быв 12-го януара 2013-го року у Хрестовоздвиженьскім катедралнім соборі в Ужгороді. Головным святительом быв домашній єпарха Мілан Шашік, співсвятителями были метрополіта піттсбурзькый Вільям Шкурла і архієпіскоп Кіріл Василь, котрый быв у тім часі секратерьом Конґреґації про восточны церькви.
Жрідло фотоґрафії: Греко-Католицьке Закарпаття.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі