Голосник

Владыка Ніл: Єм прихыльником мукачівской традіції

3-го септембра 2020-го року было на порталі RISU – Релігійно-інформаційна служба України, публіковане перше інтервю з новым апостольскым адміністратором Мукачівской ґрекокатолицькой єпархії, владыком Нілом Лущаком.

В інтервю, котре вышло під назвов Хочеме завершыти розпочаты справы владыкы Мілана, і котре робив Олександр Гаврош, одкрыла ся і тема, о якій ся довгый час бісідує, а одкрывають єй проукраїньскы кругы і внутрі церькви. Іде о існованя окремой русиньской єпархії на теріторії Україны.

Україньска ґрекокатолицька церьков (УҐКЦ) вже пару раз за остатніх 30 років намагала ся „вырішыти“ справу окремой Мукачівской єпархії, котра є в Римі записана як церьков свого права (sui iuris) русиньской традіції, значіть є незалежнов церьковнов штруктуров од Києва, арґументуючі, же в єдній державі не можуть быти дві різны ґрекокатолицькы церькви. Дотеперь Рим, єднако як і мукачівскы єпіскопы не припущали, жебы Мукачівску єпархію приєднати до складу УҐКЦ – церькви іншой традіції.

О тім, яка буде доля Мукачівской єпархії ся зачало говорити знова по смерти мукачівского єпархы, владыкы Мілана Шашіка. Гаврош в інтервю споминать, же ся точіть діскусія о можливім „соєдиненю Мукачівской єпархії з УҐКЦ,“ і споминать, же римокатоликы ся вже соєдинили і вытворили єдну штруктуру на Україні. Владыка Ніл ся в інтервю приголосив ку тому, же є прихыльником мукачівской традіції, чім дав сіґнал, же із приєднаньом Мукачова до УҐКЦ не є согласный.

„То не простый вопрос. Многых знепокоює. Владыка Мілан все боронив мукачівску традіцію. Така є позіція і Апостольского престола. Я так само прихыльником той лінії. То была наша одкрыта позіція,“ повів у інтервю новый апостольскый адміністратор.

Владыка Ніл Лущак быв помічным єпіскопом Мукачівской ґрекокатолицькой єпархії од новембра 2012-го року, коли быв выменованый Папом римскым Венедіктом XVI. Єпіскопске рукуположіня прияв в януарі 2013-го року. За апостольского адміністратора єпархії быв выменованый Папом римскым Франціском 20-го юла 2020-го року, в день похорону мукачівского єпархы Мілана Шашіка, котрый наглі вмер 14-го юла.

Жрідло фотоґрафіЇ: Греко-Католицьке Закарпаття.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі