Владыка Паісий посвятил кресты на новобудувану церков на Яворі

В другій ден Великодня, з благословліня архієпископа Паісия, владыкы перемышльско-ґорлицкого, в высівскій парохіяльній церкви св. Михала была одслужена пасхальна вечырня, вчас котрой владыка посвятил пят крестів, якы звінчат бані новобудуваной православной церкви на Святій Горі Явір.

Будова новой святыні на Яворі фурт поступує. Як в своій проповіди припомнул архієрей, новобудуваный храм буде памятником трьох ювілеів православной церкви в Польщы: 100-літя Автокефалиі ПАПЦ, обявліня Богородиці на Горі Явір і повороту Лемків до віры вітців – православя.

Православна святыня, яка возникат на верху горы Явір, буде сполналя функцию церкви, а не лем каплиці. Припомнийме, што рішыня о побудуваню православной святыні было результатом признаня старой, памятковой каплиці на властніст грекокатолицкій Церкви, што наступило по судовым рішыню.

Проєкт нового храму підготовила компанія NASZA Pracownia Projektowa з Ліщын, яку окрем Петра Криницкого творит його жена, Івона Іскра-Криницка. Ансамбль, што робил над комплексовым проєктом святыні, творят дальшы лемківскы майстры. Конструктором є Андрий Мерена, а проєкт електричной інсталяциі зробила Ірина Квока. Подля думкодавців, храм має навязувати свойом архітектуром до сакрального будівництва на Лемковині.

Перед посвячыньом крестів архієпископ Паісий інформувал, што тогорічна літургія третього дня Пасхы на Святій Горі Явір ся не одбуде. «Приготовліня місця під богослужыня затримало бы роботы на пару дни, а знаючы змінніст атмосферичных обставин, каждый ден опізніня діє на нашу некорыст» – писал архієрей.

Хто з Вас має дяку – може спомочы будову черeз посыланя датків на банковый рахунок перемышльско-ґорлицкой єпархіі (з аднотацийом: Свята Гора Явір).

фот. Давид Лорчык, orthodox.pl