Вмер Іван Мадзік – лемківскій еміґрацийный діяч

4. мая 2024 р. на 88 році жытя вмер єден з нашых еміґрацийных лемківскых діячів старшого поколіня – Іван Мадзік (1935-2024). Долгы рокы популяризувал історию і культуру Лемків в Зъєднаных Штатах Америкы, был активным діячом лемківскых еміґрацийных кругів.

Покійный вродил ся 25. мая 1935 р. в Бортным. Там провюл своі дітячы рокы. По выгнаню з рідного села в рамках акциі «Вісла» і оселіню на західніх землях Польщы, в 1966 р. подал ся за ліпшым жытьом до Австралиі, а в маю 1969 р. прибыл до Зъєднаных Штатів Америкы. До еміґрациі робил ґеодетом, а тіж служыл в Польскій Народній Арміі (Ludowe Wojsko Polskie).

Іван Мадзік досліджал історию Лемковины, а предовшыткым свого рідного села – Бортного. Зобрал цінну бібліотеку і артефакты, якы служат теперішнім дослідникам Лемків в Америці. Його приватный архів неєднократно послужыл до досліджаня лемківскых тем і реализациі проєктів. Вельо з його цінных материялів нашло ся в книжці – обшырній моноґрафіі села Бортне, яку підготовил др Богдан Горбаль.

Через долгы рокы был членом Ґрупы Славістичных Студий на Southern Connecticut State University. Активно анґажувал ся в жытя православной Церкви в ЗША, в тым тых парохій, якы творили выхідці з Карпатской Руси. Гордо підперал Лемко-Союз, єдну з нашых найстаршых лемківскых орґанізаций, реактивувану по роках. В Лемко-Союзі полнил м.ін. функцию скарбника.

Іван Мадзік дал чысленны інтервю на тему рідного села Бортне і жытя Лемків. В 2011 р. дал інтервю першому лемківскому радию ЛЕМ.фм, котре в тамтым часі зачынало свою діяльніст.

О смерти Івана Мадзіка нашу редакцию поінформувал др Богдан Горбаль з Ню Йорка. Похоронны богослужыня одбудут ся 9. мая 2024 р. в православній карпаторусиньскій парохіі св. Йоана Крестителя в Бріджпорт, пак Покійный спочне на цмонтери в Ансоні.

Вічна Йому Памят!